काठमाडौं । संघीय मामिला तथा सामान्य प्रशासन मन्त्री भगवती न्यौपानेले लामो समयदेखि दुर्गम क्षेत्रमा रहेर सेवा गरिरहेका कर्मचारीलाई सुगम क्षेत्रमा ल्याउने गरी मन्त्रालयले काम गरिरहेको बताएकी छिन्।
मन्त्रालय सम्हालेको एक महिना पुगेको अवसरमा सिंहदरबारमा आयोजित पत्रकार सम्मेलनमा मन्त्री न्यौपानेले भनिन्, “लामो समयदेखि सुगममा बस्ने तर दुर्गममा जान नमान्ने कर्मचारीहरूको नाम संकलन भइरहेको छ र ती नाम सञ्चारमाध्यमलाई उपलब्ध गराइनेछ। सरुवामा केही कर्मचारीहरू सधैँ दुर्गममा बसिरहने, केही सुगममा मात्रै बस्ने, केही धेरै वर्षदेखि भ्याली नछोड्ने, केही धेरै वर्षदेखि दुर्गममा बसिरहने अवस्था पनि छ।”
मन्त्री न्यौपानेले प्रमुख प्रशासकीय अधिकृत (सीएओ) धेरै ठाउँमा निमित्तले कार्यरत रहेको अवस्थामा भदौ महिनाभित्र सबै ठाउँमा स्थायी प्रमुख प्रशासकीय अधिकृतले काम गर्ने गरी व्यवस्था मिलाइएको जानकारी दिइन्।
उनी भन्छिन्, “निमित्तले प्रमुख प्रशासकीय अधिकृत भएर काम चलाइरहेको अवस्था जिरोमा झार्न गृहकार्य सुरु गरेका छौँ। नमानेको खण्डमा आर्थिक अधिकार कटौती समेत गरिएका छन्। राष्ट्रसेवक कर्मचारीहरू कुनै काम नगरी मात्र तलव लिने स्थिति बन्नु हुँदैन। सबैले सेवा समर्पित भएर काम गर्नुपर्छ। हामी यसका लागि विवरण संकलन गर्दैछौँ।”
मन्त्री न्यौपानेले दुर्गममा जान नमान्ने कर्मचारीहरूको नाम सार्वजनिक गर्ने चेतावनी पनि दिइन्। “जो धेरै समयदेखि दुर्गममा हुनुहुन्छ, उहाँहरूलाई न्याय गरिनेछ। जो धेरै समयदेखि भ्यालीभित्र बसिरहनुभएको छ, उहाँहरूलाई अन्यत्र खटाइनेछ।”
