काठमाडौं । चितवनको सिमलतालमा भएको बस दुर्घटनामा तीन जना बाँच्न सफल भएका छन् । त्रिशूलीमा खसेको गणपति डिलक्सबाट ३ जना यात्रु हाम फालेका मध्ये एकजना डिस्चार्ज भएका छन् । जिल्ला प्रहरी कार्यालय चितवनका डीएसपी भेषराज रिजालका अनुसार दुर्घटनामा घाइते भएका उनिहरु मध्येका सुरज गुप्ता अस्पतालबाट डिस्चार्ज भएका हुन् ।
काठमाडौंबाट गौर जाँदै गर्दा बागमती प्रदेश–०३–००१ ख २४९५ नम्बरको बस त्रिशूलीमा खसेपछि हाम फालेर नदीबाट बाहिर आएको उनीहरूले प्रहरीलाई बताएका छन् ।
हाम फालेर त्रिशूलीबाट निस्कनेमा रौतहटको देवाही गोनाही नगरपालिका–१ घर भएका ३० वर्षीय नन्द दास, राजदेवी नगरपालिका–९ घर भएका ४५ वर्षीय जोगेश्वर राय यादव र गण्डमाई नगरपलिका–३ घर भएका २६ वर्षीय सुरज गुप्ता छन् ।
नन्द दास र जोगेश्वर राय यादवको चितवनस्थित नयाँ मेडिकल कलेजमा उपचार भइरहेको छ । दुर्घटनामा बाँच्न सफल जोगेश्वर रायले आफ्नो परिवारका पाँच जनामध्ये आफुमात्र बाँच्न सफल भएको बताएका छन् ।
बीबीसीसँगको कुराकानीमा उनले भनेका छन्, ‘बसमा छोरा, जेठी छोरी र एक–एक जना नाति र नातिनी थिए, पाँच जनामा चार जना सबै खतम भए ।’ काठमाडौंमा उपचार गरेर घर फर्कँदै गरेको बताउने जोगेश्वर रायले आफू चढेको गाडी एक्कासी हल्लिएको र चार पटक पल्टा खाएर खोलामा खसेको बताए ।
उनले भने, ‘त्यसपछि म पनि डुबेँ। पाँच–छ घुट्की पानी पिएँ ।’ त्यहाँबाट कसरी कसरी बाहिर निस्किएर म पौडी खेलेर किनारमा आएँ ।
पौडिएर नदी किनारमा पुगेपछि अँध्यारोमा छामछुम गरेर सडकसम्म आएको उनले सुनाए । रायका अनुसार उनीसँगै बसमा उनका छोरा,छोरी, नाति र नातिनी पनि थिए।
‘बसमा छोरा, जेठी छोरी, एक जना नाति र एक जना नातिनी थिए। पाँच जनामा म मात्रै बाचेँ,’ रायले भने। घाइतेहरूका अनुसार उनीहरूलाई प्रहरीले त्यहाँबाट गाडी चढाएर अस्पताल पु¥याएको हो।
दुर्घटनामा बाँच्न सफल अर्का व्यक्ति रौतहटका नन्दन दासले मुग्लिनमा खाना खाएर बस अघि बढेको एक डेढ घण्टा पछि दुर्घटना भएको बताए ।
उनले माथिबाट पहिरो आएको र बस पल्टिएर नदीमा पुगेको बताए। नदीमा पुगेपछि झ्यालबाट बाहिर निस्किएर पौडिँदै किनारमा पुगेको उनले बताए । उनले पौडी खेल्दै जाँदा ढुङ्गा र त्यसपछि झाडी भेटिएको र झारहरू समातेर सडकमा निस्किएको बताए।
