काठमाडौँ। काठमाडौँ जिल्ला अदालतले नक्कली भुटानी शरणार्थी प्रकरणमा दोषी ठहर भएका पूर्वउपप्रधानमन्त्री टोपबहादुर रायमाझी र पूर्वगृहमन्त्री बालकृष्ण खाणसहित १६ जना प्रतिवादीको सजाय निर्धारण गरेको छ।
न्यायाधीश तेजबहादुर खड्काको इजलाशले मंगलबार सजाय निर्धारण गर्दै रायमाझीलाई ४ वर्ष कैद र ४० हजार रुपैयाँ जरिवाना तथा खाणलाई २ वर्ष कैद र २० हजार रुपैयाँ जरिवाना गर्ने फैसला सुनाएको हो।
यसअघि अदालतले २३ असारमा उक्त प्रकरणका ३१ प्रतिवादीमध्ये १६ जनालाई दोषी ठहर, ७ जनालाई सफाइ तथा ८ जनाको मुद्दा मुल्तवीमा राख्ने आदेश दिएको थियो। त्यसअनुसार मंगलबार दोषी ठहर भएकाहरूको कैद र जरिवाना निर्धारण गरिएको हो।
अदालतले टेकनाथ रिजाललाई २ वर्ष कैद र २० हजार रुपैयाँ जरिवाना गरेको छ। यस्तै केशवप्रसाद दुलाल, सानु भण्डारी, सागर राई, सन्देश शर्मा, डा. इन्द्रजित राई, विक्रम भन्ने गोविन्दकुमार चौधरी, आङटावा शेर्पा तथा टेकनारायण पाण्डेलाई जनही ४ वर्ष कैद र ४० हजार रुपैयाँ जरिवाना सुनाइएको छ। डा. इन्द्रजित राईका हकमा भने ज्येष्ठ नागरिक ऐनबमोजिम कैद छुटसम्बन्धी विशेष व्यवस्था लागू हुने अदालतले उल्लेख गरेको छ।
यस्तै नरेन्द्र केसी, शमशेर मियाँ, हरीभक्त महर्जन र निरञ्जनकुमार खरेललाई १ वर्ष कैद र १० हजार रुपैयाँ जरिवाना तोकिएको छ। बेचन झालाई ठगी उद्योग कसुरमा १ वर्ष कैद र १० हजार रुपैयाँ जरिवाना हुने फैसला गरिएको छ।
नक्कली भुटानी शरणार्थी बनाएर अमेरिका पठाइदिने प्रलोभन देखाई सर्वसाधारणबाट करोडौँ रुपैयाँ ठगी गरिएको बहुचर्चित प्रकरणमा अदालतले दोषी ठहर भएका प्रतिवादीहरूको सजाय निर्धारणसँगै मुद्दा अब उच्च अदालतमा पुनरावेदनको चरणमा जाने सम्भावना रहेको छ।
