काठमाडौँ। हाल नेपालमा पश्चिमी वायु, स्थानीय वायुका साथै पूर्वी भूभाग नजिक रहेको न्यून चापीय क्षेत्रको मिश्रित प्रभाव देखिएको छ। जल तथा मौसम विज्ञान विभागका अनुसार नेपालको दक्षिणतर्फ पूर्वपश्चिम फैलिएको न्यून चापीय रेखाका कारण पनि देशभरको मौसममा फेरबदल आएको हो।
अहिले देशभर साधारणतया बादल लागेको छ। कोशी, बागमती, गण्डकी प्रदेशका केही स्थानहरू तथा लुम्बिनी र कर्णालीका थोरै स्थानमा मेघगर्जन र चट्याङसहित हल्कादेखि मध्यम वर्षा भइरहेको छ।
दिउँसो देशभर बादल लाग्ने सम्भावना छ। कोशी, बागमती र गण्डकी प्रदेशका पहाडी तथा हिमाली क्षेत्रमा मेघगर्जन, चट्याङ र असिनासहित मध्यम वर्षा र हिमपात हुनसक्छ। विशेषगरी बागमती र गण्डकी प्रदेशका एक-दुई स्थानमा भारी वर्षाको समेत सम्भावना रहेको छ।
कोशी, मधेश, बागमती, गण्डकी र लुम्बिनी प्रदेशका केही स्थानमा हावाहुरीसहित वर्षा हुने देखिन्छ। कर्णाली र सुदूरपश्चिममा पनि थोरै स्थानमा मौसम बिग्रन सक्ने अनुमान छ।
भोलि सोमबार सुदूरपश्चिम लगायत पहाडी भूभागका धेरै स्थानमा असिना र हावाहुरीसहित वर्षा हुनेछ। भोलि सुदूरपश्चिम र कर्णाली प्रदेशका केही पहाडी क्षेत्रमा भारी वर्षाको चेतावनी दिइएको छ।
मेघगर्जन, चट्याङ, असिना र हावाहुरीका कारण जनजीवन प्रभावित हुन सक्ने भएकाले आवश्यक सतर्कता अपनाउन मौसम पूर्वानुमान महाशाखाले सबैमा अनुरोध गरेको छ। विशेषगरी पहाडी क्षेत्रमा पहिरो र हिमाली क्षेत्रमा हिमपातको जोखिम रहने हुँदा यात्रा गर्दा ध्यान दिन सुझाव दिइएको छ।
