काठमाडौं। लेबनानमा इसराइली सेना (आईडीएफं) ले आक्रमणलाई निरन्तरता दिएको छ।
त्यसको जवाफमा हिज्बुल्लाहले पनि मिसाइल प्रहार गरेको छ। पछिल्लो एक घण्टाभित्र विकसित घटनाक्रमले दक्षिण लेबनानमा तनाव झनै चर्किएको संकेत दिएको छ।
दक्षिण लेबनानको चौकिन क्षेत्रस्थित एक गाउँ इसराइली हवाई आक्रमणपछि पूर्ण रूपमा ध्वस्त भएको बताइएको छ। सार्वजनिक भएका तस्बिरहरूले गाउँ भग्नावशेषमा परिणत भएको पुष्टि गरेका छन्।
यसअघि इसराइली वायुसेनाले सामाजिक सञ्जाल प्लेटफर्म एक्समा पोस्ट गर्दै आफूले उक्त क्षेत्रमा ‘आतंकवादी अखडा’लक्षित गर्ने जनाएको थियो। पोस्टमा उल्लेख गरिएको थियो कि हिज्बुल्लाहका प्रक्षेपण स्थलहरूमा आक्रमण सुरु गरिसकिएको छ।
लेबनानको सरकारी सञ्चारमाध्यमका अनुसार इसराइली लडाकु विमानहरूले अन्य विभिन्न शहरहरूमा पनि आक्रमण गरेका छन्। ती आक्रमणमा सर्वसाधारण घाइते भएका छन् भने धेरै घरहरू ध्वस्त भएका छन्।
यसैबीच, हिज्बुल्लाहले इसराइलमाथि जवाफी आक्रमण गरेको पुष्टि गरेको छ। समूहले जारी गरेको वक्तव्यमा उत्तरी इसराइलतर्फ रकेट प्रहार गरिएको जनाइएको छ। हिज्बुल्लाह समर्थक टेलिभिजन अलमनार मार्फत सार्वजनिक वक्तव्यमा हाइफा सहरलाई ‘उन्नत मिसाइल’प्रयोग गरी निशाना बनाइएको दाबी गरिएको छ।
उक्त वक्तव्यमा समूहले आफूले संघर्षविरामको पालना गरे पनि ‘दुश्मनले नगरेको’ आरोप लगाउँदै प्रतिकार गरिएको जनाएको छ। साथै, बिन्त जबैल क्षेत्रमा इसराइली सैनिकमाथि पनि रकेट प्रहार गरिएको दाबी गरिएको छ, यद्यपि यसबारे आईडीएफले कुनै प्रतिक्रिया दिएको छैन।
इसराइलका आपतकालीन सेवाहरूले उत्तरी क्षेत्रमा भएको आक्रमणको प्रतिकार गरिरहेको बताएका छन्। स्थानीय सञ्चारमाध्यमका अनुसार हाइफ़ा क्षेत्रमा साइरन बजेका थिए।
यसैबीच, समाचार संस्था रोयटर्सका अनुसार इसराइलको तेल अवीवमा पनि एयर रेड साइरन बजाइएको छ, जसले क्षेत्रीय सुरक्षा अवस्था अझ जटिल बन्दै गएको संकेत गरेको छ।
