काठमाडौं। रास्वपा सभापति रवि लामिछानेले आइतबार प्रधानमन्त्री सुशीला कार्कीसँग बालुवाटारमा शिष्टाचार भेट गर्दै वर्तमान सरकारप्रति सकारात्मक सन्देश दिएका छन्। भेटका क्रममा लामिछानेले सरकारका निर्णयप्रति रास्वपाको कुनै आपत्ति नरहेको स्पष्ट पार्दै अर्को सरकार गठन नहुँदासम्म पूर्ण क्षमताका साथ काम गर्न आग्रह गरे।
लामिछानेले प्रधानमन्त्री कार्कीको नेतृत्वमा समयमै निष्पक्ष र शान्तिपूर्ण निर्वाचन सम्पन्न हुनु मुलुकका लागि ठूलो उपलब्धि भएको बताए। उनले छोटो समय, सीमित स्रोत र सानो प्रशासनिक संरचनाबीच पनि विश्वलाई चकित पार्ने गरी निर्वाचन सम्पन्न भएको उल्लेख गर्दै यसलाई लोकतान्त्रिक निकासको सफल उदाहरण रहेको बताए
लामिछानेले प्रधानमन्त्री कार्कीको ‘चट्टानी अडान’ का कारण मुलुकले राजनीतिक संक्रमणबाट सहज अवतरण पाएको टिप्पणी गर्दै आगामी दिनमा पनि कार्कीको अनुभव, मार्गदर्शन र अभिभावकीय भूमिका आवश्यक रहने बताए। यसले रास्वपाले नयाँ राजनीतिक समीकरण बनाउँदा पनि वर्तमान संक्रमणकालीन नेतृत्वसँग टकराव होइन, सहकार्यको संकेत दिएको रूपमा हेरिएको छ।
प्रधानमन्त्री कार्कीले भने रास्वपाले निर्वाचनमा पाएको सफलताप्रति बधाई दिँदै अब जनअपेक्षा अनुसार परिणाम दिनुपर्ने जिम्मेवारी युवापुस्तामाथि आएको बताइन्। देश निराशाको अवस्थामा रहेको उल्लेख गर्दै उनले ‘देशको मुहारमा मुस्कान फर्काउने काम अब नयाँ शक्तिले देखाउनुपर्छ’ भन्ने सन्देश दिइन्।
