काठमाडौँ । आउँदो प्रतिनिधि सभा निर्वाचनमा जिल्ला बाहिर रहेका मतदाताले मतदान गर्न नपाउने भएका छन्। निर्वाचन आयोगले निश्चित समूहका लागि मात्रै अस्थायी मतदाता नामावली संकलन गरेकाले सबै मतदाताले अन्तरजिल्ला मतदान गर्न पाउने व्यवस्था गरिएको छैन।
शुक्रबार आयोगले पत्रकार सम्मेलनमार्फत निर्वाचन तयारीबारे जानकारी दिँदै निर्वाचन प्रक्रिया द्रुतगतिमा भइरहेको जनाएको छ। आयोगका प्रवक्ता नारायणप्रसाद भट्टराईले यस पटक अन्तरजिल्ला मतदानको व्यवस्था नभएको स्पष्ट पारे। उनले भने, “कानुनी र प्राविधिक पूर्वतयारी गर्नुपर्ने भएकाले यो पटक त्यो काम गर्न सकेनौँ।”
विदेशमा रहेका नागरिकले पनि मतदान गर्नुपर्ने माग उठेको थियो, तर आयोगले जिल्ला बाहिरबाट मतदान गर्न पाउने व्यवस्था गर्न सकेन। यसअघि जस्तै, यस पटक पनि निर्वाचनमा खटिने प्रहरी, कर्मचारी, कारागारका कैदीबन्दी र वृद्धाश्रममा रहेका ज्येष्ठ नागरिक मात्रै अस्थायी मतदाता सूचीमा समावेश छन्।
निर्वाचन सुरक्षाबारे सोधिएको प्रश्नमा प्रवक्ता भट्टराईले डराउनुपर्ने अवस्था नरहेको बताए। उनले भने, “सुरक्षाकै कारणले निर्वाचनमा डराउनुपर्ने, मतदान गर्न जान डराउनुपर्ने अवस्था छैन। जिल्ला तहमै एकीकृत सुरक्षा योजना बनाएर काम भइरहेको छ।”
सामाजिक सञ्जालको दुरुपयोग रोक्ने विषयमा उनले प्रयास जारी रहेको जानकारी दिए। “हामीले मेटा र टिकटकसँग सम्पर्क गरेका छौं, दुवै कम्पनीले सकारात्मक जवाफ दिएका छन् र आयोग उनीहरूसँग निरन्तर सम्पर्कमा छ।”
उम्मेदवार फिर्ताको विषयमा प्रवक्ता भट्टराईले अहिलेसम्म जानकारी नभएको र फिर्ता लिन चाहने उम्मेदवारले पुस २८ सम्म मात्र निवेदन दिनुपर्ने पनि स्पष्ट पारे।
