भक्तपुर । सञ्चार तथा सूचना प्रविधिमन्त्री जगदीश खरेलले आफूले निर्वाचनमा उम्मेदवारी दिने–नदिने विषयमा अहिलेसम्म कुनै निर्णय नगरेको स्पष्ट पारेका छन्।
राष्ट्रिय स्वतन्त्र पार्टीको तर्फबाट निर्वाचनमा उम्मेदवारी दिने चर्चा चलिरहेका बेला मन्त्री खरेलले सो विषयमा आफ्नो कुनै निर्णय नभएको बताएका हुन्। बुधबार नेपाल पत्रकार महासंघ भक्तपुर शाखाले आयोजना गरेको कार्यक्रममा बोल्दै उनले आफू कुनै पनि राजनीतिक दलमा प्रवेश नगरेको र यससम्बन्धी कुनै वार्ता वा छलफलसमेत नगरेको स्पष्ट गरे।
‘म यहाँहरूलाई आज स्पष्ट पार्न चाहन्छु-मैले अहिलेसम्म चुनावमा उठ्ने वा नउठ्ने भन्ने विषयमा कुनै निर्णय गरेको छैन। दोस्रो कुरा, म आजको मितिसम्म कुनै पनि पार्टीमा प्रवेश गरेको छैन, गएको छैन, वार्ता वा छलफल पनि गरेको छैन,’ मन्त्री खरेलले भने।
उनले हाल आफू र सरकारको सम्पूर्ण ध्यान आगामी निर्वाचन सफलतापूर्वक सम्पन्न गराउन केन्द्रित रहेको उल्लेख गरे। ‘मेरो अहिले सम्पूर्ण ध्यान अन्तरिम सरकारका सम्माननीय प्रधानमन्त्री सुशीला कार्कीको नेतृत्वमा रहेको सरकारमार्फत निष्पक्ष र व्यवस्थित रूपमा चुनाव गराउनेतर्फ केन्द्रित छ,’ उनले थपे।
आफूले निर्वाचनमा उम्मेदवारी दिनका लागि कुनै पनि पार्टीसँग छलफल नगरेको अवस्थामा केही सञ्चारमाध्यममा फरक ढंगले समाचार आएको भन्दै मन्त्री खरेलले असन्तुष्टि समेत व्यक्त गरे।
‘म आजको दिनसम्म कुनै पनि पार्टीमा गएको छैन, चुनाव उठ्छु वा उठ्दिन केही पनि भनेको छैन। तर समाचारहरू अलिकति फरक ढंगले आइरहेका छन्। त्यसप्रति मेरो आपत्ति छैन, तर सही तथ्य जनसमक्ष आउनुपर्छ,’ उनले भने।
मन्त्री खरेलले आफ्नो धारणा स्पष्ट पार्दै अहिलेलाई निर्वाचन उम्मेदवारीबारे कुनै निर्णय नभएको पुनः दोहोर्याए।
