काठमाडौं । नेकपा एकीकृत समाजवादी नेताहरूको कार्य विभाजनसहित अन्तर पार्टी निर्देशन (अपानि) जारी गरेको छ। अध्यक्ष माधव नेपालले १० औँ राष्ट्रिय महाधिवेशनपछि नेताहरूको कार्य विभाजनसहितको अपानि पठाएका हुन्।
अपानिमा भनिएको छ, ‘दशौँ राष्ट्रिय महाधिवेशनपछि नयाँ कार्य विभाजनलगायतका काममा हामी केही ढिलो भएका छौँ । यसबारे पार्टी पङ्क्तिमा चासो र जिज्ञासा प्रकट हुनु स्वाभाविक छ । तर, यही समयमा हामीले आन्तरिक रूपमा समाधान गर्नैपर्ने कतिपय विषयलाई समाधान गरेका छौँ र पार्टी पङ्क्तिलाई महाधिवेशनको फैसला मुताबिक अगाडि बढ्न एकताबद्ध बनाएका छौँ ।’
स्थायी कमिटी विस्तार गर्ने, पार्टीको केन्द्रीय सचिवालय र केन्द्रीय कार्यालयको गठन गर्ने, केन्द्रीय आयोगहरू र केन्द्रीय सल्लाहकार परिषद्का साथै ज्येष्ठ कम्युनिष्ट मञ्चको गठन गर्ने र केन्द्रीय कमिटी सदस्यहरूको कार्यविभाजन गरेको उल्लेख छ।
केन्द्रीय विभागहरूको गठन प्रक्रिया आरम्भ गर्नुका साथै पार्टी पङ्तिलाई गतिशील बनाउँदै, एजेन्डामा आधारित भएर स्थानीय जनजागरण तथा जनपरिचालनको विस्तार गर्दै र राष्ट्रिय आन्दोलनको विकास गर्दै पार्टीलाई राष्ट्रिय राजनीतिको केन्द्रमा स्थापित गर्ने ठोस कार्य योजना पनि बनाउनको उल्लेख छ।
नेकपा एसले जिल्ला र संघीय निर्वाचन क्षेत्र इञ्चार्ज तथा सहइञ्चार्ज, मोर्चा तथा फाँटका प्रमुख, उपप्रमुख र इञ्चार्ज तथा सहइञ्चार्ज, केन्द्रीय आयोगहरूलाई पूर्णता, विभागीय प्रमुख तथा उपप्रमुख पनि तोकेको अपानिमा उल्लेख छ।
