काठमाडौं । काठमाडौं उपत्यका प्रहरी कार्यालयका प्रमुख प्रहरी अतिरिक्त महानिरीक्षक (एआइजी) टेक बहादुर तामाङले मातहत कार्यालय प्रमुखहरूसँग आर्थिक वर्ष २०८२/०८३ का लागि वार्षिक कार्यसम्पादन सम्झौतामा हस्ताक्षर गरेका छन् ।
गत भदौ ८ गते संगठन प्रमुख प्रहरी महानिरीक्षक (आईजीपी) दिपक थापा र उपत्यका प्रहरी प्रमुख एआइजी तामाङबीच भएको सम्झौता अनुसार रानीपोखरीस्थित कार्यालयमा विशेष समारोहका बीच सम्झौता पत्रमा हस्ताक्षर गरिएको हो ।
समारोहमा अघिल्लो आर्थिक वर्ष २०८१/०८२ को कार्यसम्पादन सम्झौताको कार्यान्वयन र प्रगतिबारे विश्लेषण गरिएको थियो । सो विश्लेषणमा कार्यसम्पादनको अवस्था सन्तोषजनक रहेको निष्कर्ष निकालिएको छ ।
सम्झौता कार्यक्रममा एआइजी तामाङले मातहत कार्यालय प्रमुखहरूलाई सम्झौता पत्रमा उल्लेख गरिएका कार्यहरूलाई प्रभावकारी ढंगले कार्यान्वयन गर्न निर्देशन दिए । उनले यसपटकको सम्झौतामा नवप्रवर्तन, सिर्जनात्मक कार्य तथा समसामयिक विषयहरू समेत समावेश गरिएकाले यसले प्रहरी सेवालाई अझ चुस्त र प्रभावकारी बनाउन मद्दत गर्ने विश्वास व्यक्त गरे ।
साथै उनले “Safe Kathmandu Valley (सुरक्षित उपत्यका)” अभियानलाई सफल बनाउन सबै मातहत कार्यालयहरूको ऐक्यवद्धता रहनेमा विश्वास व्यक्त गरे ।
