काठमाडौं । नेपाल समाजवादी पार्टी (नयाँ शक्ति) का अध्यक्ष बाबुराम भट्टराईले कास्की प्रहरीको हिरासतमा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेलाई भेटेका छन् ।
शुक्रबार बिहान कास्की पुगेर भट्टराईले लामिछानेलाई भेटेका हुन् । भेटपछि पत्रकारहरूसँग कुरा गर्दै डा. भट्टराईले ‘रविमािथ राजनीतिक प्रतिशोध साँधिएको र सहकारी समस्यालाई विषयान्तर गरिन लागेको’ दाबी गरे ।
उनले सहकारीको रकम हिनामिना गर्नेहरु राज्य सत्ताका आसेपासे भएको र उनीहरुलाई उन्मुक्ति दिने तथा विपक्षीमाथि प्रतिशोध साँध्ने काम भएको जिकिर मात्र गरेनन्, बचतकर्ताको रकम सुरक्षा गर्नेतर्फ राज्य उदासीन भएको आरोप पनि लगाए ।
उनले पचासौं लाख साना बचतकर्ताहरूको समस्या हल गर्नतिर सरकार नलागेको पनि बताए । एकातिर लामिछानेमाथि कारबाही प्रक्रिया लम्ब्याएर अर्कातिर सहकारी पचासौं लाख त्यस्ता बचतकर्ताहरूको समस्यालाई विषयान्तर गर्न खोजिएको भट्टराईको भनाइ छ ।
‘सहकारी पीडितको समस्यालाई विषयान्तर गरिँदैछ, राज्यले चाह्यो भने गर्न सक्छ । पहिला स-साना बचतकर्ताहरूलाई राहत दिने र पछि ज-जसले अपचलन गरेका छन् तिनको सम्पत्ति जफत गरेर राज्यले लिए भयो त,’ उनले भने ।
आफूसँगको भेटमा लामिछानेले पनि राज्यले प्रतिशोध साधेको बताएको भट्टराइले सुनाए । यद्यपि राज्यलाई सहयोग गरेको र आगामी दिनमा पनि गर्ने बताएको भट्टराइको भनाइ छ ।
