काठमाडौं । नख्खु कारागारमा रहेका राष्ट्रिय स्वतन्त्र पार्टी (रास्वपा) सभापति रवि लामिछानेले भैरहवा कारागारमा आफूलाई गोलघरमा जस्तै गरी राखिएको बताएका छन्।
लामिछानेसँगको भेटपछि नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले पत्रकारहरूसँग कुरा गर्दै भने, “उहाँको भाषामा भन्ने हो भने भैरहवामा झन्डै–झन्डै गोलघरमा जस्तै गरी राखियो, धेरै ठूलो पीडामा भएँ भन्ने थियो।”
प्रचण्डले भैरहवा कारागारमा बस्दाको जटिल परिस्थिति लामिछानेको अनुहारमै देखिएको उल्लेख गर्दै थपे, “भैरहवा बस्दाखेरीको स्थिति अलि धेरै नै जटिल थियो, उहाँको अनुहारमा पनि देखिन्छ। उहाँ दुब्लाउनु भएको छ।”
नख्खु कारागारमा भने खानपान र बसाइ भैरहवाको तुलनामा राम्रो रहेको भन्दै लामिछानेले व्यवस्थापनको प्रशंसा गरेको प्रचण्डले बताएका छन्।
