काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले अबदेखि पार्टीका पदाधिकारी र जनप्रतिनिधिहरूले आफ्ना सन्तानलाई अनिवार्य रूपमा सार्वजनिक विद्यालयमै पढाउनुपर्ने बताएका छन्।
काठमाडौंमा आयोजित एक कार्यक्रममा सम्बोधन गर्दै अध्यक्ष दाहालले माओवादी केन्द्र नेतृत्वमा रहेका १२३ स्थानीय तहका प्रमुख, उपप्रमुख र नेताहरूलाई काठमाडौंमा भेला गरी आफ्ना छोराछोरीलाई निजी विद्यालयमा नभई सार्वजनिक विद्यालयमै भर्ना गराउने निर्णय गरिसकेको जानकारी दिए।
“मैले अस्ति भर्खरै पार्टीको केन्द्रीय समितिको बैठकपछि माओवादी केन्द्रको नेतृत्वमा भएका १२३ वटा सरकार प्रमुख, उपप्रमुख र पार्टी नेताहरूलाई काठमाडौंमा भेला गरेर एउटा निर्णय गरिएको छ,” अध्यक्ष दाहालले भने, “अब सबै स्थानीय सरकारका नेताहरू र पार्टी नेताहरूले आफ्ना सन्तानलाई सार्वजनिक विद्यालयमा पढाउनुपर्नेछ। निजी विद्यालयमा वा विदेशमा पढाउन पाइने छैन।”
उनले आफूले दिएको निर्देशन कार्यान्वयनमा रहेको दाबी गर्दै थपे, “म माओवादीको अध्यक्ष हुँ, सबैभन्दा ठूलो नेता। मेरा छोराछोरीमध्ये कोही पनि विदेश पढ्न गएका छैनन्।”
दाहालले पार्टीको नीति अनुसार अब माओवादी नेताहरूका सन्तान विदेश अध्ययनको लागि नपठाइने स्पष्ट पारे। उनले यो अभियानले सार्वजनिक शिक्षाप्रति विश्वास बढाउने र शिक्षा प्रणाली सुधार गर्ने दिशामा सहयोग पुग्ने विश्वास व्यक्त गरे।
