काठमाडौं। नेपालका लागि भारतका पूर्वराजदूत रञ्जित रायले नेपालमा नयाँ शक्ति आएकाले भारतले त्यसलाई बुझ्नुपर्ने् बताएका छन्।
रायले भारतले अहिलेसम्म पुराना दलहरुसँग मात्र काम गरेकामा हालैको चुनावबाट नयाँ शक्ति आएकाले अपेक्षा बुझ्नुपर्ने बताएका हुन्।
गत बिहीबारको प्रतिनिधिसभा निर्वाचनबाट नेपालमा राष्ट्रिय स्वतन्त्र पार्टीले एकल बहमुत ल्याएको छ भने काठमाडौं महानगरपालिकाका पूर्वमेयर बालेन्द्र शाह बालेन प्रधानमन्त्री बन्दैछन्। यो सन्दर्भमा बिबिसी हिन्दीले आफ्नो समाचारमा पूर्वराजदुत रायसँग कुरा गरेको थियो।
‘अहिलेसम्म भारतले नेपालका पुराना दलहरूसँग काम गरेको छ, तर अब नयाँ शक्ति आएको छ। भारतका लागि यो चुनौती हो कि उसले यो शक्तिलाई बुझोस्, उनीहरूको अपेक्षा बुझोस् र उनीहरू नेपाललाई कसरी अगाडि बढाउन चाहन्छन् भन्ने पनि थाहा पाओस्। छिमेकमा हामीले आफ्नो विदेश नीतिलाई युवा केन्द्रित बनाउनुपर्छ,’ उनले भनेका छन्।
त्यस्तै, उनले बालेन काठमाडौंका मेयर हुनु र नेपालका प्रधानमन्त्री हुनु फरक कुरा भएको बताए। ‘मलाई लाग्दैन कि बालेन शाहको मूल्यांकन मेयर हुँदा गरेका गतिविधिका आधारमा मात्र गर्नुपर्छ। यी दुई बिल्कुल फरक कुरा हुन्। प्रधानमन्त्रीका रूपमा जिम्मेवारी धेरै बढ्छ। राष्ट्रिय स्वतन्त्र पार्टीका नेताहरूसँग म भेटेको छु, र उनीहरू भारतप्रति निकै सकारात्मक छन्,’ उनले भनेका छन्।
