काठमाडौं । अर्थमन्त्री बिष्णुप्रसाद पौडेलले सरकारले सवारीसाधन बेच्ने मात्र नभएर अब उत्पादनतर्फ लाग्नु पर्ने समय आएको बताएका छन् ।
नेपाल अटोमोबाइल्स एशोसिएशन अफ नेपाल नाडाको आयोजनामा मंगलबारदेखि शुरु भएको ‘नाडा अटो शो २०२४’ को उद्घाटन गर्दै उनले यस्तो बताएका हुन् ।
उनले भने, ‘अटो क्षेत्रका लागि नीतिगत सुधारसहित अघि बढने अहिलेको सरकारको योजना छ, अब सवारीसाधन बेच्ने मात्र होइन, अब अटो उत्पादनतर्फ लाग्नुपर्छ, राज्यले यसमा साथ दिन्छ।’ अटो मोबाइल्सको छेत्रमा देखिएको समस्यालाई समाधान गर्ने बताएका छन्।
उनले विद्युतीय सवारी(ईभी) को साधनको हकमा सरकारले चाँडै नै उचित नीति लिने पनि बताए।उनले थप्दै भने, ‘मौद्रिक नीतिले अटो क्षेत्रलाई समग्र रुपमा नछोए पनि समग्र अर्थतन्त्रमा सुधार ल्याएको छ,त्यसैले यसमा समय क्रम अनुसार परिमार्जन हुँदै जाने छ।’
उनले अटो व्यवसाय राजस्वमा योगदान गर्ने एउटा महत्वपूर्ण क्षेत्र भएकाले आफूले यसलाई विशेष रुपले लिएको पनि बताए।
यसैगरी, नेपाल उद्योग वाणिज्य महासंघका अध्यक्ष चन्द्र प्रसाद ढकालले अटो मोवाइल्सलाई विलासिताको साधन(लक्जरी) को रुपमा हेर्न नहुने बताए ।उनले यसलाई लक्जरीको रुपमा नभई आर्थिक सुधारको गेम चेन्जरको रुपमा लिनु पर्ने बताए।
उनले भने,‘यसलाई लक्जरीको रुपमा हेरियो भने सानो देखिन्छ, अटो मोबाइल्सलाई आर्थिक सुधारका दृष्टिकोणले मात्र नभएर राजस्वदेखि सबै कुराको रुपमा हेर्नुपर्दछ ।’
