काठमाडौं । कैलाली जिल्ला कारागारमा भएको झडपमा कुटपिटबाट मृत्यु भएका कैदीबन्दी भरत चौधरीको परिवारलाई सुदूरपश्चिम प्रदेश सरकारले पाँच लाख रुपैयाँ उपलब्ध गराउने भएको छ। आइतबार राति बसेको प्रदेश सुरक्षा समितिको बैठकले उक्त निर्णय गरेको हो।
बैठकले कारागार घटनामा घाइते भएका कैदीबन्दीहरूको उपचार सरकारी खर्चमा गर्ने निर्णय पनि गरेको छ। प्रदेशको आन्तरिक मामिला तथा कानुन मन्त्रालयका प्रवक्ता तथा प्रदेश सुरक्षा समितिका सदस्य सचिव आमोद दाहालका अनुसार बैठकले ११ वटा निर्णय गरेको छ।
निर्णयअनुसार आन्तरिक मामिला तथा कानुन मन्त्रालयमार्फत कारागारमा हेलोजन लाइट र सिसी क्यामेरा जडान गर्ने, कारागारको छानालगायत आवश्यक मर्मत कार्य सुरु गर्ने, सुरक्षाका लागि आवश्यक उपकरण खरिद गर्ने, कारागार ऐनमा सुधारका लागि केन्द्र सरकारलाई सिफारिस गर्ने र कारागारको क्षमताअनुसार कैदीबन्दी व्यवस्थापन गर्न कारागार विभागलाई अनुरोध गर्ने व्यवस्था गरिएको छ।
त्यस्तै, प्रदेश सरकार र कारागार प्रशासनबीच समन्वय गरी कैदीबन्दीका लागि मनोपरामर्श कार्यक्रम सञ्चालन गर्ने, कारागार सुरक्षामा खटिने सुरक्षाकर्मीलाई प्रत्येक तीन महिनामा परिवर्तन गर्ने र प्रदेशभरका कारागारमा भोजनगृह, स्नानगृह तथा शौचालय निर्माण वा मर्मत गर्ने कार्य अघि बढाउने निर्णय पनि भएको छ।
बैठक प्रदेशका मुख्यमन्त्री कमलबहादुर शाहको विशेष उपस्थितिमा सम्पन्न भएको थियो, जसमा आन्तरिक मामिलामन्त्री हिरा सार्की, तीनवटै सुरक्षा निकायका प्रदेश प्रमुख, कैलालीका प्रमुख जिल्ला अधिकारी गोगनबहादुर हमाललगायतको सहभागिता थियो।
