काठमाडौं । राष्ट्रिय मानवअधिकार आयोगका प्रतिनिधिहरूले भैरहवा कारागारको अनुगमन गर्दा क्षमताभन्दा बढी कैदीबन्दी, अपर्याप्त शौचालय र न्यून सुविधाको समस्या रहेको पाएका छन्।
आयोगकी प्रवक्ता लिली थापाका अनुसार कारागारमा रहेका शौचालयको अवस्था सन्तोषजनक छैन। उनले रास्वपा सभापति रवि लामिछानेको कोठामा एसी नभएको र झ्यालहरू प्लाइउडले टालिएकाले हावा आवतजावत हुन नसकेको बताइन्। “कोठामा दुई वटा पंखा छन् तर झ्यालहरू बन्द गरिएको रहेछ। हाम्रो आग्रहपछि मात्र खोल्न तयार भएको छ,” थापाले भनिन्।
थापाले अदालतको आदेश हुँदाहुँदै पनि लामिछानेलाई अन्यत्र स्थानान्तरण नगरेको विषयमा आयोगको गम्भीर ध्यानाकर्षण भएको उल्लेख गरिन्। उनका अनुसार कारागारमा पत्रपत्रिका नपुग्ने भएकाले लामिछानेसहित कैदीहरू सूचना सुविधाबाट वञ्चित छन्।
मानवअधिकार संस्था इन्सेककी प्रतिनिधि रिमा बिसीले लामिछानेको कोठामा एउटा ठूलो फलामको पंखा र अर्को स्ट्यान्ड पंखा रहेको बताइन्। उनका अनुसार प्रशासनले नजिकैका घर र सर्पदंशको जोखिमका कारण झ्याल बन्द राखिएको बताएको छ। तर, जाली वा डन्डी राखेर झ्याल खोल्ने सुझाव दिइएको र प्रशासनले त्यसमा सहमति जनाएको उनले जानकारी दिइन्।
