काठमाडौं । नेपाल सरकारले गत १३ चैतमा गरेको निर्णयअनुसार शासकीय सुधारका १०० बुँदामध्ये स्वास्थ्य क्षेत्रसँग सम्बन्धित बुँदा नम्बर ८५ अन्तर्गत स्वास्थ्य तथा जनसंख्या मन्त्रालयले विभिन्न क्षेत्रमा प्रगति हासिल गरेको जनाएको छ।
मन्त्रालयका अनुसार ३२ वटा अस्पतालमा निःशुल्क उपचार सम्बन्धी विवरण अद्यावधिक गरिएको छ। यसमा १९ निजी र १३ सरकारी अस्पतालका १० प्रतिशत बेडमा निःशुल्क उपचार सेवा उपलब्ध गराइएको छ। जसको विवरण मन्त्रालयको वेबसाइटमार्फत सार्वजनिक गरिएको छ।
अस्पताल सेवाको गुणस्तर सुधारका लागि वीर अस्पताल, शहीद गंगालाल राष्ट्रिय हृदय केन्द्र र कान्ति बाल अस्पताल लगायतका अस्पतालमा अनुगमन गरी आवश्यक सुधारका लागि पृष्ठपोषण गरिएको मन्त्रालयले जनाएको छ। साथै अस्पताल सेवा सुधार निर्देशिकाको प्रारम्भिक मस्यौदा तयार गरिएको छ। १५ चैतमा संघीय तथा प्रादेशिक अस्पतालहरूसँग सेवा गुणस्तर सुधारसम्बन्धी छलफल सम्पन्न भएको र त्यसअनुसार विभिन्न अस्पतालबाट सुधार कार्ययोजना कार्यान्वयन प्रतिवेदन प्राप्त भएको मन्त्रालयले उल्लेख गरेको छ।
जलन उपचार सेवा विस्तारतर्फ टीकापुर अस्पताल, महाकाली प्रादेशिक अस्पताल, सेती प्रादेशिक अस्पताल तथा कलैया अस्पतालमा जलन वार्ड स्थापना तथा सेवा सञ्चालनको तयारी सुरु गरिएको छ। त्यसैगरी मधेस स्वास्थ्य विज्ञान प्रतिष्ठानमा अवरुद्ध रहेको जलन उपचार सेवा पुनः सञ्चालनमा ल्याइएको छ।
दुर्गम तथा पहाडी क्षेत्रमा आपतकालीन स्वास्थ्य सेवा सुदृढ बनाउन सुदूरपश्चिम, मध्य तथा पूर्वी नेपालका पहाडी क्षेत्रमा एयर एम्बुलेन्स तयारी अवस्थामा राख्ने व्यवस्था कार्यान्वयनमा रहेको मन्त्रालयले जनाएको छ। साथै ज्यान जोखिममा परेका गर्भवती तथा सुत्केरी महिलाको हवाई उद्धारलाई प्रभावकारी बनाउन महिला, बालबालिका तथा ज्येष्ठ नागरिक मन्त्रालय सँग समन्वय गरी कार्यविधि संशोधन प्रक्रिया अघि बढाइएको छ।
