एजेन्सी । भारतको गोवा राज्यको अरपोरा क्षेत्रमा रहेको एक नाइट क्लबमा शनिबार राति लागेको आगलागीमा परी चार नेपालीसहित २५ जनाको मृत्यु भएको छ। घटनामा ६ जना घाइते भएका छन्।
गोवा सरकारले सार्वजनिक गरेको सूचिका अनुसार मृत्यु हुने २० जना क्लबका कर्मचारी हुन्, जसमा चार जना नेपालका नागरिक रहेका छन्। भारतीय मिडिया रिपोर्टअनुसार मृतक नेपालीहरूमा चुर्णबहादुर पुन, विवेक कटवाल, सविन र सुदीप रहेका छन्। उनीहरूको व्यक्तिगत विवरण सार्वजनिक भएको छैन।
गोवा सरकारले शव नेपाल पठाउने व्यवस्था मिलाइने जनाएको छ। अधिकारीका अनुसार नाइट क्लबमा कार्यक्रम भइरहेका बेला प्रयोग गरिएको इलेक्ट्रोनिक फायरक्राकरबाट आगो सुरु भएको अनुमान गरिएको छ। साँघुरा मार्गका कारण दमकल समयमा नपुग्दा आगो फैलिन पुगेको बताइएको छ।
प्रारम्भिक अनुसन्धानमा क्लबले सुरक्षा मापदण्ड पालना नगरेको र अवैध रूपमा सञ्चालन भएको देखिएको छ। घटनापछि गोवा प्रहरीले महाप्रबन्धक र कर्मचारीसहित चार जनालाई पक्राउ गरेको छ। क्लबका मालिकविरुद्ध मुद्दा दर्ता गरिएको छ, साथै नियमविपरीत अनुमति दिएको आरोपमा तीन सरकारी अधिकारी निलम्बनमा परेका छन्।
गोवाका मुख्यमन्त्री प्रमोद सावन्तले मृतकका परिवारलाई पाँच लाख भारतीय रुपैयाँ र घाइतेलाई ५० हजार रुपैयाँ राहत उपलब्ध गराइने घोषणा गरेका छन्। साथै, अनुमति बिना सञ्चालन भइरहेका क्लब र भीडभाड हुने स्थानको अडिट गर्ने बताएका छन्।
प्रत्यक्षदर्शीहरूले क्लबमा भीड अत्यधिक रहेको र आगो लागेपछि छिट्टै संरचनामा क्षति पुगेको बताएका छन्।
गोवा आगलागीमा मृत्यु भएका व्यक्तिहरूको सूची
- चुर्ण बहादुर पुन — नेपाल
- विवेक कटवाल — नेपाल
- सबिन — नेपाल
- सुदीप — नेपाल
- मोहित— झारखण्ड
- प्रदीप महतो— झारखण्ड
- बिनोद महतो— झारखण्ड
- सतीश सिंह — उत्तराखण्ड
- सुरेन्द्र सिंह — उत्तराखण्ड
- जितेन्द्र सिंह — उत्तराखण्ड
- सुमित नेगी — उत्तराखण्ड
- मनिश सिंह — उत्तराखण्ड
- दिगम्बर पटिर — असम
- राहुल तन्ती— असम
- मनोजित माल — असम
- सुनील कुमार — उत्तर प्रदेश
- रोहन सिंह — उत्तर प्रदेश
- डोमिनिक — महाराष्ट्र
- मनोज जोरा — महाराष्ट्र
- इसहाक — कर्नाटक
- सुभास क्षेत्री— दार्जिलिङ, पश्चिम बंगाल
- सरोज जोशी — दिल्ली
- विनोद कुमार — दिल्ली
- अनिता जोशी — दिल्ली
- कमला जोशी — दिल्ली
