काठमाडौं। खाडी क्षेत्रमा कार्यरत नेपाली श्रमिकलाई तत्काल उद्धार गरेर ल्याउनुपर्ने अवस्था अहिलेसम्म नआएको परराष्ट्र मन्त्रालयले जनाएको छ।
परराष्ट्र सचिव अमृतकुमार राईले बुधबार आयोजित पत्रकार सम्मेलनमा हालसम्मको सरकारी विश्लेषणअनुसार त्यहाँ रहेका नेपालीको जीवनमा तत्काल जोखिम उत्पन्न भएको अवस्था नदेखिएको बताएका हुन्।
‘अहिलेसम्मको हाम्रो विश्लेषणअनुसार जीवनमाथि जोखिम सिर्जना भएर तुरुन्त उद्धार गरेर ल्याउनुपर्ने अवस्था आएको छैन,’ उनले भने, ‘कोही पनि चिन्तित वा विचलित हुनुपर्ने अवस्था छैन। नेपालमा रहेका परिवारजन र पश्चिम एसियामा रहेका नेपाली समुदायलाई पनि यही सन्देश प्रवाह गर्न चाहन्छु।’
राईले केही पश्चिमी मुलुकले विशेष कारणले आफ्ना नागरिकलाई उद्धार गरिरहेको भए पनि श्रमिक पठाउने मुलुकहरूले भने अहिलेसम्म यस्तो कदम नचालेको बताए।
‘हामीजस्तै श्रमिक पठाउने बंगलादेश, भारत, पाकिस्तान, श्रीलंकाजस्ता देशहरूले पनि आफ्ना नागरिकको उद्धार सुरु गरेका छैनन्,’ उनले भने।
तर परिस्थिति जटिल बनेर उद्धार आवश्यक परे नेपाल सरकार त्यसका लागि सक्षम रहेको उनको भनाइ छ। ‘यदि उद्धार गर्नुपर्ने अवस्था आयो भने सरकारले जुनसुकै हालतमा पनि आफ्ना नागरिकलाई सुरक्षित ल्याउनेछ,” राईले भने।
