काठमाडौं। निर्वाचन आयोग, नेपालले प्रतिनिधिसभा सदस्य निर्वाचन २०८२ अन्तर्गत समानुपातिकतर्फको मतगणना सम्पन्न भएको जनाएको छ। आयोगले बिहीबार प्रेस विज्ञप्ति जारी गर्दै समानुपातिक निर्वाचन प्रणालीतर्फको पूर्ण मतगणना सकिएको जानकारी दिएको हो।
आयोगका अनुसार समानुपातिकतर्फ प्राप्त मतका आधारमा विभिन्न राजनीतिक दलले प्राप्त गर्ने सिट संख्या पनि निर्धारण गरिएको छ। समानुपातिकतर्फ कुल ११० सिट छ।
निर्धारित परिणामअनुसार समानुपातिकतर्फ सबैभन्दा बढी सिट राष्ट्रिय स्वतन्त्र पार्टी (रास्वपा) ले प्राप्त गरेको छ। रास्वपाले ५७ सिट पाएको छ।
दोस्रो ठूलो दल का नेपाली कांग्रेस २० सिट, एमालेले १६ सिट, नेपाल कम्युनिष्ट पार्टीले ९ सिट तथा श्रम संस्कृति र राष्ट्रिय प्रजातन्त्र पार्टी ४/४ सिट पाएका छन्।
आयोगका अनुसार प्रतिनिधिसभा सदस्य निर्वाचन ऐन, २०७४ अनुसार समानुपातिकतर्फ प्राप्त मतका आधारमा दलहरूले पाउने सिट संख्या निर्धारण गरिएको हो।
निर्धारित सिटअनुसार अब सम्बन्धित राजनीतिक दलहरूले बन्दसूचीमा रहेका उम्मेदवारमध्येबाट कानुनी व्यवस्था अनुसार प्रतिनिधिसभा सदस्यका लागि नाम सिफारिस गर्नुपर्ने आयोगले जनाएको छ।
आयोगका सहसचिव नारायणप्रसाद भट्टराई द्वारा जारी विज्ञप्तिमा समानुपातिकतर्फको मतगणना प्रक्रिया पूर्ण रूपमा सम्पन्न भएको उल्लेख गरिएको छ।
प्रत्यक्षतर्फ भने रास्वपाले १२५ सिट, कांग्रेसले १८, एमालेले ९, नेकपाले ८, श्रम संस्कृतिले ३ र राप्रपाले एक सिट जितेका छन्। त्यस्तै, म्याग्दीबाट स्वतन्त्र उम्मेदवार महावीर पुन विजयी भएका छन्।
