काठमाडौं। सरकारले नयाँ शैक्षिक सत्र १५ दिन पछाडि धकेलेको छ। यसअघिका वर्षमा १ वैशाखबाट नयाँ शैक्षिक सत्र सुरु हुने गरेकामा यसपटक १५ वैशाखबाट मात्र भर्ना लिइने भएको छ। पठनपाठन भने २१ वैशाखबाट मात्र हुनेछ।
शिक्षा तथा मानव स्रोत विकास केन्द्रले बिहीबार सार्वजनिक सूचना जारी गर्दै देशभरका विद्यालयमा वैशाख २१ गतेदेखि नियमित पठनपाठन सुरु हुने जनाएको छ।
केन्द्रले स्थानीय तह र विद्यालयलाई पठाएको निर्देशनपत्रमा १५ वैशाखदेखि भर्ना अभियान सुरु हुने तथा त्यसपछि २१ वैशाखदेखि कक्षा सञ्चालन गर्नुपर्ने उल्लेख गरिएको छ।
नेपाल सरकारको निर्णयअनुसार नयाँ शैक्षिक शनिबार र आइतबार दुई दिन सार्वजनिक बिदा कायम गरिएकाले विद्यालयहरूले सोहीअनुसार शैक्षिक कार्यक्रम पुनःसंरचना गर्नुपर्ने भएको छ।
यसअघि २ वैशाखदेखि विद्यालयहरूलाई शैक्षिक सत्र ०८३ को कार्ययोजना निर्माण, वार्षिक शैक्षिक तालिका तयारी, विद्यालय सुधार योजना अद्यावधिक, शिक्षकको पेशागत क्षमता विकास कार्यक्रम सञ्चालन तथा विद्यार्थीको सिकाइ उपलब्धि सुधारसम्बन्धी योजना बनाउन आग्रह गरिएको छ।
केन्द्रका निर्देशक डा।चूडामणि प्रसाद आचार्य द्वारा हस्ताक्षरित पत्रमा सबै विद्यालयलाई आवश्यक समन्वय र तयारी पूरा गरेर नयाँ शैक्षिक सत्र सञ्चालन गर्न अनुरोध गरिएको छ।
