काठमाडौं । सभामुख देवराज घिमिरेले सामान्य मागहरूको सुनुवाइका लागि सडक आन्दोलन गर्नुपर्ने अवस्थाको अन्त्य गर्नु आवश्यक रहेको बताएका छन्।
बिहीबार सिंहदरबारमा खोटाङको दिक्तेल रूपाकोट मझुवागढी नगरपालिकाका नगरप्रमुख तीर्थराज भट्टराईको नेतृत्वमा हस्तान्तरण गरिएको बाँसबाट निर्मित सामग्री ग्रहण गर्दै सभामुख घिमिरेले जनप्रतिनिधिहरूका व्यवहारिक मागहरूलाई प्राथमिकतामा राखेर सम्बोधन गर्नुपर्ने आवश्यकता औँल्याए।
सभामुख घिमिरेले भने, “सडकमा गएर आन्दोलन गरेर बाध्यकारी परिस्थिति सिर्जना भएपछि मात्र न्यूनतम मागहरू सुन्ने परिपाटीको अन्त्य हुनुपर्छ। व्यवहारिक र सान्दर्भिक मागहरूलाई अस्वीकार गर्ने स्थिति हुनुहुँदैन। यदि त्यो सम्भव छैन भने पनि स्पष्ट रूपमा जानकारी दिनुपर्छ।”
उनले कोसिस हुँदाहुँदै पनि सुनुवाइ नभएपछि सडकमा जाने अधिकारलाई गैरसंवैधानिक भन्न नमिल्ने उल्लेख गरे। तर उनले सडक संघर्ष अन्तिम विकल्प बन्नु नपर्ने धारणा राखे।
“प्राथमिकता नपाएको भनेर सडकमै जानुपर्ने स्थिति आउनु दुःखद हो,” सभामुख घिमिरेले भने, “त्यस्तो अवस्था अन्त्य गर्न सबै पक्ष गम्भीर हुनुपर्छ।”
कार्यक्रममा नगरप्रमुख भट्टराईले खोटाङको उत्पादन र सम्भावनाबारे जानकारी गराउँदै स्थानीय स्रोतसाधनको उचित उपयोगका लागि संघीय सरकारको ध्यानाकर्षण गराएका थिए।
