काठमाडौं। नेपाली कांग्रेस केन्द्रीय कार्यसमितिले गगन थापाले सभापति पद्बाट दिएको राजीनामा सर्वसम्मत रूपमा अस्वीकृत गरेको छ।
फागुन २१ गते सम्पन्न प्रतिनिधिसभा निर्वाचनको परिणामको नैतिक जिम्मेवारी लिँदै सभापति थापाले विधानको धारा २६(१) अनुसार उपसभापतिसमक्ष राजीनामा बुझाएका थिए। तर, सानेपास्थित केन्द्रीय कार्यालयमा चैत ६ देखि ८ गतेसम्म बसेको केन्द्रीय समिति बैठकले उक्त राजीनामा अस्वीकार गर्दै वर्तमान परिस्थितिमा नेतृत्व निरन्तरता नै उपयुक्त हुने निष्कर्ष निकालेको हो।
बैठकले निर्वाचन पराजयलाई केवल नेतृत्वको कमजोरी नभई संरचनागत समस्या, आन्तरिक असहयोग र नियन्त्रणबाहिरका राष्ट्रिय–राजनीतिक परिस्थितिसँग जोडेर विश्लेषण गरेको छ। पार्टीभित्र चरम गुटबन्दी, गठबन्धन सरकारको कमजोर कार्यसम्पादन, पटक–पटक सरकार परिवर्तनबाट उत्पन्न जनआक्रोश तथा नयाँ पुस्ताको असन्तोषलाई हारका मुख्य कारणका रूपमा औँल्याइएको छ। यसैले सभापति थापाको राजीनामा स्वीकार गर्दा पार्टीभित्र थप अस्थिरता, अन्योल र कार्यकर्ताको मनोबलमा गिरावट आउने ठहर गरिएको छ।
बैठकको अध्यक्षता गरेका उपसभापति विश्वप्रकाश शर्माले प्रस्तुत गरेको २७ बुँदे प्रारम्भिक समीक्षा प्रतिवेदनलाई संशोधनसहित पारित गरिएको छ। अब जिल्ला र निर्वाचन क्षेत्रबाट थप प्रतिवेदन संकलन गरी विस्तृत समीक्षा गरिने जनाइएको छ। कांग्रेसले पराजयलाई ‘व्यक्तिगत असफलता’ भन्दा ‘प्रणालीगत चुनौती’ को परिणामका रूपमा व्याख्या गर्दै नयाँ नेतृत्वलाई छोटो समयमै सबै चुनौती समाधान गर्न कठिन भएको निष्कर्ष निकालेको छ।
राजीनामा अस्वीकृत भएसँगै पार्टीको सम्पूर्ण ध्यान अब १५औँ महाधिवेशनतर्फ मोडिएको छ। महाधिवेशनमार्फत नयाँ नेतृत्व चयन, विधान संशोधन, संगठनात्मक पुनर्संरचना तथा भावी रणनीति तय गरिने कांग्रेसले जनाएको छ। ‘कांग्रेस २.०’ नाम दिइएको सुधार कार्यक्रमलाई निरन्तरता दिन पनि वर्तमान नेतृत्व आवश्यक रहेको बैठकको निष्कर्ष छ।
पार्टीले कार्यकर्तालाई अनुशासन, एकता र उच्च मनोबल कायम राख्न आह्वान गर्दै निर्वाचन परिणामलाई पुनर्निर्माणको अवसरका रूपमा लिनुपर्ने सन्देश दिएको छ। साथै मध्यपूर्व तनावका कारण प्रभावित नेपालीहरूको सुरक्षामा सरकार गम्भीर हुनुपर्ने, विशेषगरी अमृत झालाई सकुशल स्वदेश फर्काउन पहल गर्न सरकारसँग माग गरिएको छ।
यस निर्णयसँगै कांग्रेसभित्र तत्काल नेतृत्व संकट टरेको देखिए पनि १५औँ महाधिवेशनसम्म गुट व्यवस्थापन, संगठन पुनर्संरचना र निर्वाचन हारको वास्तविक समीक्षा नै सभापति थापाको मुख्य राजनीतिक परीक्षा बन्ने देखिएको छ।
