वीरगन्ज। वीरगञ्ज महानगरपालिका–११ श्रीपुरमा आइत्बार भएको घटनाका कारण लगाइएको कर्फ्यु सोमबार साँझ हटाइएको छ। स्थानीय प्रशासनले कर्फ्यु हटाएर निषेधाज्ञा लागू गरेको हो।
जिल्ला सुरक्षा समितिको बैठकले सुरक्षा अवस्थाको समीक्षा गर्दै परिस्थिति सामान्यतर्फ उन्मुख भएको निष्कर्ष निकालेपछि कर्फ्यू हटाउने निर्णय गरेको हो।
सोमबार जिल्ला प्रशासन कार्यालय पर्सामा प्रमुख जिल्ला अधिकारी भोला दाहालको अध्यक्षतामा भएको सर्वदलीय तथा सर्वपक्षीय बैठकले ‘घटना’लाई कानुनी ट्रयाकमा लैजाने र ‘सद्भाव’लाई प्राथमिकता दिने साझा सन्देश दिएको छ।
बैठकले पीडितपक्षबाट जाहेरी लिएर प्रक्रिया यथाशीघ्र टुंग्याउने र दोषीलाई कानुनी दायरामा ल्याउने सहमति गरेको छ। यसमा धार्मिक अगुवाहरूले सहजीकरण गर्ने निर्णय पनि गरिएको छ ।
प्रजिअ दाहालका अनुसार, व्यक्तिगत घटना वा दुर्घटनालाई बहाना बनाउँदै धार्मिक–सामाजिक सद्भाव खल्बलिने गरी भड्काउने, दुष्प्रचार गर्ने वा सामाजिक सञ्जालमा घृणा फैलाउने सामग्री प्रसारण गर्नेलाई साइबर कानुनसहित प्रचलित कानुनबमोजिम कारबाही गरिनेछ। यसलाई बैठकले स्पष्ट सन्देशका रूपमा अघि सारेको छ।
यस्तै, आगामी दिनमा सद्भाव कायम राख्न राजनीतिक दल, मिडियाकर्मी, धार्मिक तथा सामाजिक अगुवा र जनप्रतिनिधिले आफ्ना–आफ्ना संस्थाबाट संयम र सहिष्णुताका लागि विज्ञप्ति जारी गर्ने निर्णय भएको छ। पर्साका प्रहरी प्रमुख नरेन्द्रराज सुवेदीले पनि दोषीलाई कानुनी दायरामा ल्याउने प्रतिबद्धता जनाए।
