काठमाडौं । जल तथा मौसम विज्ञान विभागको बाढी पूर्वानुमान महाशाखाले साउन २९ (बिहीबार) का लागि देशका विभिन्न क्षेत्रमा बाढीको सम्भावना बढेको जानकारी दिएको छ।
महाशाखाका अनुसार, आज बिहान मापन अनुसार कोसी, नारायणी, बागमती, कर्णाली, महाकाली, साथै तिनका सहायक नदीहरू र कन्काई, कमला, पूर्वी राप्ती, पश्चिम राप्ती र बबई नदीको बहाव हाल सतर्कता तहभन्दा तल भए पनि दिउँसो बढ्ने सम्भावना छ।
जिल्लागत रूपमा, डोटी, डडेलधुरा, कैलाली, कञ्चनपुर र आसपासका साना नदीहरूमा बहाव उल्लेख्य बढ्ने भएकाले आकस्मिक बाढीको मध्यम जोखिम उच्च रहेको छ।
त्यस्तै, इलाम, झापा, पाँचथर, मोरङ, तेह्रथुम, धनकुटा, ताप्लेजुङ, संखुवासभा, रामेछाप, दोलखा, सिन्धुपाल्चोक, उदयपुर, गोरखा, लमजुङ, कास्की, पर्वत, गुल्मी, पाल्पा, रुपन्देही, कपिलवस्तु, बागलुङ, अर्घाखाँची, प्युठान, दाङ, बाँके, बर्दिया, रोल्पा, सल्यान, रुकुम-पश्चिम, जाजरकोट, दैलेख, कालीकोट, बाजुरा, बाझाङ, दार्चुला, बैतडी र आसपासका जिल्ला भई बहने केही साना नदीमा बहाव बढ्ने भएकाले मध्यम जोखिमको मध्यम सम्भावना रहेको छ।
महाशाखाले पूर्वतिरको तुलनामा पश्चिमतर्फ मनसुन बढी सक्रिय रहेको र दिउँसो यी स्थानहरूमा भारी वर्षा हुने सम्भावना रहेको समेत जनाएको छ।
सतर्कता अपनाउनका लागि महाशाखाले उल्लिखित ४० जिल्लालाई पहेँलो रङ दिँदै बासिन्दालाई सचेत रहन सुझाव दिएको छ।
बासिन्दाले नदी किनारमा नजानु, सुरक्षित स्थानमा रहनु र स्थानीय प्रशासनको निर्देशनको पालना गर्नु जरुरी रहेको महाशाखाले सचेत गराएको छ।
