काठमाडौं । जेनजी युवा आन्दोलनका क्रममा जलाइएका २९ वटा सरकारी सवारी साधनको अर्थ मन्त्रालयले मर्मत सम्भार गरेको छ । यसका लागि झण्डै २३ लाख रुपैयाँ खर्च भएको मन्त्रालयले जनाएको छ ।
चारपाङ्ग्रे गाडीहरूको मर्मतका लागि मन्त्रालयले कोटेसन आह्वान गरेको थियो । सो प्रक्रियामा सिनामंगलस्थित जगन्नाथ अटो केयरले २२ लाख ७८ हजार ९५० रुपैयाँको न्यूनतम प्रस्ताव गरेको र त्यसैमार्फत मर्मत गराइएको मन्त्रालयको भनाइ छ ।
मन्त्रालयले यस वर्ष नयाँ सवारी साधन नकिन्ने स्पष्ट पारेको छ । निर्वाचन प्रयोजन बाहेक अन्य सरकारी निकायलाई पनि नयाँ गाडी खरिद गर्न रोक लगाइएको छ ।
गत भदौ २३ र २४ गते भएको आन्दोलनका क्रममा राजधानीमै ४४१ वटा चारपाङ्ग्रे र ६०१ वटा दुईपाङ्ग्रे गरी १ हजार ४२ वटा सवारी साधनमा क्षति भएको प्रारम्भिक विवरणमा उल्लेख गरिएको छ ।
