काठमाडौं। गत बिहीबार सम्पन्न प्रतिनिधिसभा निर्वाचनको समानुपातिकतर्फको मतगणना अन्तिम चरणमा पुगेको छ। प्रत्यक्षतर्फ १२५ सिट जितेको राष्ट्रिय स्वतन्त्र पार्टी (रास्वपा) ले समानुपातिकतर्फ पनि उल्लेख्य मत पाएको छ।
हालसम्म १ करोड ७ लाख ३९ हजार ११५ मत गणना हुँदा रास्वपाले ५१ लाख ३९ हजार २३५ मत प्राप्त गरेको छ। प्राप्त मतअनुसार समानुपातिकतर्फ रास्वपाले करिब ५८ सिट पाउने देखिएको छ।
त्यस्तै, प्रत्यक्षतर्फ १८ सिट जितेको नेपाली कांग्रेसले समानुपातिकतर्फ १७ लाख ४९ हजार ५८३ मत पाएको छ। प्रत्यक्षमा ९ सिटमा खुम्चिएको नेकपा (एमाले) ले १४ लाख ४८ हजार ८५४ मत प्राप्त गरेको छ।
यसैगरी नेकपाले ८ लाख ५ हजार ७७३ मत पाएको छ।
नेकपापछि सबैभन्दा बढी मत ल्याउने दलका रूपमा श्रम संस्कृति पार्टी देखिएको छ। चार महिनाअघि मात्रै गठन भएको यस दलले पूर्वका तीन निर्वाचन क्षेत्रमा प्रत्यक्षतर्फ जित हासिल गरेको थियो। समानुपातिकतर्फ पनि यसले राप्रपालाई उछिन्दै ३ लाख ७८ हजार ६४९ मत ल्याएको छ।
राष्ट्रिय प्रजातन्त्र पार्टी (राप्रपा) ले भने ३ लाख २९ हजार ४७२ मत पाएको छ। अन्य दलहरूले भने ३ प्रतिशतको थ्रेसहोल्ड पार गर्न सकेका छैनन्।
