काठमाडौं । नेपाली कम्युनिस्ट पार्टी (नेकपा) का नेता भीम रावलले आफ्नो पार्टी फागुन २१ गते हुने निर्वाचनका लागि पूर्ण तयारी अवस्थामा रहेको बताएका छन्। आज धनगढीमा आयोजित पत्रकार सम्मेलनमा उनले निर्वाचन स्वच्छ, भयरहित र उचित वातावरणमा सम्पन्न हुनुपर्नेमा जोड दिएका हुन्।
रावलले सरकारले हालसम्म उपयुक्त निर्वाचन वातावरण निर्माण नगरेको भन्दै कारागारबाट फरार कैदी, नियन्त्रणमा नआएका हतियार र गोली लगायतका कारणले निर्वाचनको अवस्था अझै सुरक्षित नभएको बताएका छन्। उनका अनुसार, “कैदी बन्दी फरार छन्, गोली हतियार नियन्त्रणमा आएका छैनन्। सरकारले त्यसमा ध्यान दिनुपर्छ। त्यस अवस्थामा नेपाली जनताले नेकपालाई अत्यधिक मत दिनेछन्।”
उनले मंसिर १२ देखि सुरु हुने एकता सन्देश सभाले देशभर पार्टीको जनलहर अझै बढाउने दाबी पनि गरेका छन्। धनगढी रङ्गशालामा साढे १२ बजे सुरु हुने सभामा संयोजक पुष्पकमल दाहाल ‘प्रचण्ड’, सहसंयोजक माधवकुमार नेपाल र अन्य नेताहरूले सम्बोधन गर्ने रावलले जानकारी दिएका छन्। सभाको व्यवस्थापन उनकै संयोजकत्वमा मूल व्यवस्थापन समितिले गर्ने बताइएको छ।
रावलले एमाले र काँग्रेसको दम्भका कारण भदौ २३-२४ गते सृजना भएको घटनाका लागि तत्कालीन प्रधानमन्त्री केपी शर्मा ओलीलाई सबैभन्दा बढी जिम्मेवार ठहराएका छन् र दुवै दिनको निष्पक्ष छानबिन गर्नुपर्ने माग गरेका छन्।
साथै उनले एमालेले सात वटा आपराधिक मुद्दा खेपेका व्यक्तिलाई नेसनल भोलेन्टियर फोर्सको संयोजक बनाएको आलोचना गर्दै, चुनावमार्फत त्यस्ता व्यक्ति र प्रवृत्तिलाई पाखा लगाउने पार्टीको दाबी दोहोर्याएका छन्। रावलले एमालेभित्रको विवादका कारण ठूलो पङ्क्ति नेपाल कम्युनिस्ट पार्टीमा प्रवेश गर्ने संभावना रहेको पनि बताएका छन्।
