काठमाडौं। सञ्चार तथा सूचना प्रविधि मन्त्री जगदीश खरेलले काठमाडौं उपत्यकाका १९ स्थानमा निःशुल्क इन्टरनेट सेवाको शुभारम्भ गरेका छन्। नयाँबसपार्कमा आज आयोजित कार्यक्रममार्फत सेवा सुरु गरिएको छ।
मन्त्री खरेलले भने, ‘मन्त्री पदमा बहाली हुँदा गरेको प्रतिबद्धताअनुसार निःशुल्क इन्टरनेट सेवा सुरु गरेका हौँ। यसलाई क्रमशः उपत्यकाबाहिर पनि विस्तार गर्ने योजना छ।’
सरकारले काठमाडौंसहित दुर्गम क्षेत्रहरूमा पनि इन्टरनेट पहुँच पुर्याउने काम गरिरहेको जानकारी दिँदै मन्त्री खरेलले भने,’दार्चुला, बझाङ, जाजरकोट र मनाङको तिलिचो बेसक्याम्पमा इन्टरनेट सेवा पुर्याइसकेका छौँ। सोलुखुम्बु, रामेछाप, रौतहट, म्याग्दी, बैतडी लगायतका कमजोर नेटवर्क भएका ठाउँमा प्रभावकारी इन्टरनेट सेवा पुर्याउन प्राथमिकता दिइएको छ।’
सञ्चार सचिव राधिका अर्यालले देशभर इन्टरनेटको पहुँच, स्रोतसाधन र सेवाग्राहीको मागलाई दृष्टिगत गर्दै क्षमता विस्तार भइरहेको बताइन् ।
नेपाल दूरसञ्चार प्राधिकरणका अध्यक्ष भूपेन्द्र भण्डारीले नयाँबसपार्क, विभिन्न अस्पताल, पशुपतिनाथ मन्दिर क्षेत्र र त्रिभुवन अन्तरराष्ट्रिय विमानस्थलजस्ता संवेदनशील स्थलहरूमा निःशुल्क वाइफाइ सेवा उपलब्ध भएको जानकारी दिए।
नयाँबसपार्कस्थित लोत्से बहुउद्देश्यीय प्रालिका अध्यक्ष इन्जिनियर दीपक कुँवरले सेवा सुरु भएसँगै सेवाग्राहीलाई सहजता पुग्ने विश्वास व्यक्त गरे।
प्राधिकरणले अघि नै वाइफाइ सेवा उपलब्ध भएका स्थानमा मर्मत, क्षमता वृद्धि तथा नयाँ आठ स्थानमा सेवा जडान गरिएको जनाएको छ। ठूलोभर्याङ र एकान्तकुनास्थित यातायात कार्यालयमा पनि क्षमता अभिवृद्धि भइरहेको छ।
अब नयाँबसपार्क, भक्तपुर अस्पताल, भक्तपुर क्यान्सर अस्पताल, कीर्तिपुर अस्पताल र त्रिभुवन अन्तरराष्ट्रिय विमानस्थलमा निःशुल्क वाइफाइ सेवा सञ्चालन हुने भएको छ।
सेवा दिगोपनाका लागि नेपाल टेलिकम, वर्ल्डलिङ्क र भायनेट कम्पनीहरूले सहकार्य गर्ने भएका छन्। सञ्चार मन्त्री खरेल आजै त्रिवि शिक्षण अस्पताल महाराजगञ्ज, पशुपति मन्दिर र त्रिभुवन अन्तरराष्ट्रिय विमानस्थलमा इन्टरनेट सेवाको अनुगमन गर्ने कार्यक्रम रहेको छ।
