काठमाडौं । नेकपा (एमाले) का नेता योगेश भट्टराईले प्रतिनिधि सभाका उपसभामुख इन्दिरा राना मगरको आचरणमाथि प्रश्न उठाएका छन्। बिहीबार प्रतिनिधि सभाको बैठकमा बोल्दै भट्टराईले उपसभामुखको विगत र वर्तमान गतिविधिले पदको गरिमामाथि प्रश्न उठाएको बताए।
भट्टराईले संविधानको धारा ९१ अनुसार सभामुख वा उपसभामुखले पद अनुकूलको आचरण नगरेमा दुई तिहाइ बहुमतले हटाउन सकिने प्रावधान भएको स्मरण गराउँदै उपसभामुखमाथि लागेका आरोपहरू सामान्य नभएको बताए।
उनले विशेषगरी वि.सं. २०७२ कार्तिक १७ मा बाल संगठनको सिफल बालगृहबाट पाँच बालबालिका हराएको घटनालाई उदाहरण बनाए। भट्टराईका अनुसार तत्कालीन समयमा उक्त संस्थाको कार्यकारी प्रमुख हालकी उपसभामुख मगर नै रहेको दाबी छ।
यो घटनाको छानबिनका लागि २०७६ सालमा पाटन उच्च अदालतका पूर्व न्यायाधीश हरिबाबु भट्टराईको अध्यक्षतामा उच्चस्तरीय जाँचबुझ आयोग गठन गरिएको थियो। भट्टराईले उक्त आयोगको प्रतिवेदन अझै सार्वजनिक नभएकोमा आपत्ति जनाउँदै प्रधानमन्त्रीलाई तत्काल प्रतिवेदन सार्वजनिक गर्न माग गरेका छन्।
उनले प्रतिवेदनले पीए नेपाल संस्थालाई बालबालिका ओसारपसारजस्ता संगठित अपराधमा संलग्न रहेको र थप अनुसन्धान गरी कारबाही गर्नुपर्ने सिफारिस गरेको सुनेको उल्लेख गरेका छन्।
