काठमाडौं। केही दिन मौसममा सुधार आए पनि भोलि शनिबारदेखि फेरि वर्षा हुने भएको छ। जल तथा मौसम विज्ञान विभागका अनुसार शनिबार र आइतबार देशका विभिन्न क्षेत्रमा वर्षाको सम्भावना छ।
शनिबार सातै प्रदेशमा बादल लाग्ने देखिन्छ । गण्डकी, कर्णाली र सुदूरपश्चिमका पहाडी तथा हिमाली भूभागका थोरै स्थानमा .मेघगर्जन, चट्याङसहित मध्यम वर्षा तथा हिमपात हुने आकलन छ।
त्यस्तै, सुदूरपश्चिमका तराई लगायत बाँकी हिमाली र पहाडी भूभागका एक-दुई स्थानमा हल्का वर्षा हुनेछ। कोशी, मधेश, बागमती, गण्डकी र लुम्बिनीका तराई भूभागका केही स्थानमा हावाहुरीको समेत सम्भावना छ।
आइतबार पहाडी तथा हिमाली भूभागका केही स्थानमा मध्यम वर्षा हुने छ भने तराई भूभागका थोरै स्थानमा हल्का वर्षा हुने सम्भावना छ।
आज शुक्रबार भने गण्डकी र कर्णालीका हिमाली भूभागका थोरै स्थान तथा बाँकी हिमाली र पहाडी भूभागका एक-दुई स्थानमा हल्का वर्षाको सम्भावना छ।
