एजेन्सी । भेनेजुएलाका उपराष्ट्रपति डेल्सी रोड्रिगेजले राष्ट्रपति निकोलस मदुरो र प्रथम महिला सेलिया फ्लोरेसबारे सरकारसँग हालसम्म कुनै आधिकारिक जानकारी नभएको बताएकी छन्। उनले अमेरिकासँग उनीहरू जीवित रहेको तत्काल प्रमाण उपलब्ध गराउन माग गरिएको जानकारी दिइन्।
भेनेजुएलाका रक्षामन्त्री भ्लादिमिर पाड्रिनो लोपेजका अनुसार शनिबार बिहान भएको अमेरिकी आक्रमणपछि मृतक र घाइतेको विवरण संकलन भइरहेको छ। उनले सर्वसाधारण बसोबास गर्ने आवासीय क्षेत्रमा समेत आक्रमण भएको दाबी गर्दै विदेशी सेनाको उपस्थितिको कडा विरोध जनाएका छन्।
रक्षामन्त्री लोपेजले देशभरि तत्काल सैन्य बल तैनाथ गर्ने घोषणा गर्दै सर्वसाधारणलाई एकजुट हुन आह्वान गरे। स्पेनी भाषामा सम्बोधन गर्दै उनले यो भेनेजुएलामाथिको अहिलेसम्मकै ठूलो आक्रमण भएको दाबी गरे र राष्ट्रपति मदुरोको आदेशअनुसार सबै सशस्त्र सेना परिचालन गरिएको बताए। “हामीमाथि आक्रमण गरिएको छ, तर हामी झुक्ने छैनौँ,” उनले भने।
प्रत्यक्षदर्शीहरूका अनुसार राजधानी काराकासस्थित ला कार्लोटा सैन्य अखडा र मुख्य सैन्य अड्डा फुएर्ते तिउना क्षेत्रमा विस्फोट भएका छन्। ती स्थानका विस्फोटका दृश्यहरू सामाजिक सञ्जालमा सार्वजनिक भएका छन्।
अमेरिकी राष्ट्रपति डोनाल्ड ट्रम्पले राष्ट्रपति मदुरोमाथि लागुऔषध ओसारपसार र अमेरिकामा अपराध फैलाउन संलग्न रहेको आरोप लगाउँदै आएका छन्। यसै दबाबबीच अमेरिकी आक्रमण भएको भेनेजुएलाको दाबी छ।
आक्रमणपछि राष्ट्रपति मदुरोले विज्ञप्ति जारी गर्दै घटनाको निन्दा गरेका छन् र राष्ट्रिय आपतकाल घोषणा गरेका छन्। उनले काराकासमा भएको आक्रमण भेनेजुएलाका स्रोतसाधन कब्जा गर्ने अमेरिकी रणनीतिको हिस्सा भएको आरोप पनि लगाएका छन्।
काराकासका विभिन्न क्षेत्रमा एकैसाथ विस्फोटको आवाज सुनिएको बताइएको छ, जहाँ सैन्य अखडाहरू पनि अवस्थित छन्।
