काठमाडौं । पूर्वऊर्जामन्त्री एवं नेपाली कांग्रेस नेता दीपक खड्काको स्वामित्वमा रहेको खड्का ल्यान्ड डेभलपमेन्ट प्रालि ले कब्जा गरेको नेपाल स्काउटको जग्गा काठमाडौँ महानगरपालिकाले डोजर लगाएर खाली गराएको छ।
काठमाडौँ महानगरपालिका–२६ लैनचौरस्थित नेपाल स्काउटको जग्गा लामो समयदेखि खड्काको कम्पनीले भाडामा लिएर प्रयोग गर्दै आएको थियो। स्काउटका अनुसार कम्पनीले सम्झौताअनुसार भाडा नतिरेपछि कात्तिक २० गते सूचना जारी गर्दै ७ दिनभित्र बक्यौता भुक्तानी गर्न र जग्गा खाली गर्न चेतावनी दिएको थियो।
निर्धारित म्याद सकिएपछि बिहीबार बिहान महानगरपालिकाको सहयोगमा स्काउटले जग्गा खाली गराएको हो। संरचना भत्काउने कार्यमा युवा तथा खेलकुदमन्त्री बब्बु गुप्ता स्वयं उपस्थित रहेकी थिइन्। मन्त्री गुप्ताको अगुवाइमा भएको कारबाहीबारे खेलकुद मन्त्रालयको सचिवालयले जानकारी दिएको छ।
लैनचौरस्थित कित्ता नम्बर १० को ३ रोपनी रैकर जग्गा, जुन खानी विभागसँग जोडिएको क्षेत्र हो, नेपाल स्काउट र खड्का ल्यान्ड डेभलपमेन्ट प्रालिबीच २०६५ सालमा १० वर्षे भाडा सम्झौता भएको थियो। तर सम्झौताको अवधि २०७५ सालमै सकिए पनि कम्पनीले जग्गा फिर्ता नगरेपछि कानुनी प्रक्रिया अघि बढाइएको स्काउट स्रोतले जनाएको छ। महानगरले यसलाई सार्वजनिक सम्पत्तिको दुरुपयोगविरुद्धको नियमित कारबाहीको रुपमा लिएको छ।
