काठमाडौं । नेकपा (एमाले)को नेतृत्व चयनका लागि मतदान सुरु भएको छ । पार्टीको ११औँ महाधिवेशनअन्तर्गत नयाँ नेतृत्व चयनका लागि महाधिवेशनस्थल भृकुटीमण्डपमा तोकिएको समयभन्दा करिब डेढ घण्टा ढिला गरी मतदान सुरु भएको हो ।
अध्यक्ष पदका उम्मेदवार केपी शर्मा ओली र ईश्वर पोखरेलले मत हालेर मतदान सुरु गरेका छन् । मंगलबार साँझ सुरु हुनैलाग्दा प्राविधिक समस्याका कारण स्थगित भएको मतदान आज बिहान ८ बजेका लागि तय गरिएको थियो । आज बिहान पनि ओली आउन ढिला गरेपछि साढे ९ बजेबाट मतदान सुरु भएको हो ।
महाधिवेशनमा ओली र पोखरेल प्यानल बनाएर प्रतिस्पर्धामा उत्रिएका छन् ।
महाधिवेशनमा मतदानका लागि विद्युतीय मेसिन राखिएको छ, जसमा एक जनाले भोट हाल्नका लागि करिब ३०–४० मिनेट लाग्ने जनाइएको छ । ८० वटा मेसिनबाट एकसाथ मतदान हुने पार्टीको निर्वाचन आयोगले जनाएको छ । ६ सय बढी उम्मेदवार प्रतिस्पर्धामा रहेका छन् भने २ हजार ६६२ प्रतिनिधि रहेका छन् ।
भोट हाल्न केही ढिला हुने भए पनि नतिजा भने १–२ घण्टामै आउने आयोगले जनाएको छ ।
तस्वीरहरू:
