काठमाडौं । नेकपा (एमाले) का महासचिव शंकर पोखरेलले पार्टी र संगठनभित्र फैलिँदै गएको अराजक प्रवृत्तिप्रति कडा असन्तुष्टि जनाएका छन्। बुधबार विधान महाधिवेशनको तयारी सन्दर्भमा जनसंगठनका इन्चार्ज र पदाधिकारीको भेलालाई सम्बोधन गर्दै उनले पार्टी अनुशासन भंग गर्ने गतिविधि सह्य नहुने चेतावनी दिएका हुन्।
“विधान महाधिवेशनले अन्तिम रूप दिएका कतिपय प्रावधान तत्कालीन आवश्यकताका आधारमा राष्ट्रिय महाधिवेशनले संशोधन गर्दछ,” पोखरेलले भने, “दुवै महाधिवेशनमा सहभागी भई ती प्रावधान अनुमोदन गर्ने नेताहरू अहिले आएर प्रश्न उठाउनु अनैतिक र गैरजिम्मेवार व्यवहार हो।”
पछिल्लो समय पार्टी नेतृत्व र नीतिविरुद्ध आलोचना तथा आक्रमण बढेकोप्रति चिन्ता व्यक्त गर्दै पोखरेलले पार्टीभित्र कुनै पनि बहानामा विद्रोही प्रवृत्तिलाई सहन नहुने स्पष्ट पारे। उनले पार्टीले तोकेको मार्गनिर्देशन र नीतिको उल्लङ्घन अस्वीकार्य हुने बताए।
सरकारको नेतृत्व एमालेसँग भएकै कारण पार्टीविरुद्ध झुटा प्रचार र लाञ्छनाको खेती भइरहेको पोखरेलको आरोप छ। उनले कांग्रेससँग सुमधुर सम्बन्ध बनाउन राजावादी र माओवादीहरूले एमालेलाई निशाना बनाइरहेको टिप्पणी गरे।
आगामी भदौ २०–२२ मा हुने कार्यक्रमलाई विधान महाधिवेशनको रूपमा स्पष्ट गर्दै महासचिव पोखरेलले हाल कुनै नेताको पक्ष वा विपक्षमा कित्ताकाट आवश्यक नरहेको बताए। “नीति र नेतृत्व निर्माणको भिन्नता नेताहरूले बुझ्नुपर्छ,” पोखरेलले भने, “विचारमा बहस गर्न सकिन्छ, तर पार्टीको अनुशासन उल्लंघन गरेर होइन।”
