काठमाडौं । त्रिभुवन विश्वविद्यालयको रिक्त उपकुलपति पदका लागि अन्ततः तीन जनाको नाम सिफारिस गरिएको छ। शिक्षा, विज्ञान तथा प्रविधि मन्त्री रघुजी पन्तको संयोजकत्वमा गठित उपकुलपति छनोट सिफारिस समितिले आइतबार बसेको बैठकमा ती नामहरु टुंगो लगाई आज प्रधानमन्त्री एवं कुलपति केपी शर्मा ओलीलाई बुझाएको छ।
समितिका अनुसार, उपकुलपति चयनको अन्तिम चरणमा १२ जना प्रतिस्पर्धीमध्ये पाँच जनाको नाममा प्राथमिक छनोट भएको थियो। तीमध्ये गहिरो छलफलपछि तीन जना प्राध्यापकको नाम सिफारिस गरिएको हो। यद्यपि सिफारिसमा परेका नामहरू भने औपचारिक रूपमा सार्वजनिक गरिएको छैन।
स्रोतका अनुसार, निमित्त उपकुलपति प्रा.डा. खड्ग केसी, प्रा.डा. बिनिल अर्याल, प्रा.डा. योगेन्द्रबहादुर गुरुङ, प्रा.डा. उपेन्द्र कोइराला र प्रा. डिल्ली उप्रेतीबीचबाट तीन जना सिफारिसमा परेका हुन्। समितिको प्रस्ताव प्रधानमन्त्री ओलीले स्वीकार गरेपछि उपकुलपति नियुक्तिको प्रक्रिया अघि बढ्नेछ।
पूर्व उपकुलपति प्रा.डा. केशरजंग बरालले १३ महिनामै पदबाट राजीनामा दिएपछि चैत २८ गते उनकाे राजीनामा स्वीकृत गरिएको थियो। त्यसपछि वैशाख २ गते शिक्षाध्यक्ष प्रा.डा. केसीलाई निमित्त उपकुलपतिको जिम्मेवारी दिइएको थियो।
नयाँ उपकुलपतिको नियुक्ति भएलगत्तै त्रिविमा लामो समयदेखि स्थगित रहेका नीतिगत निर्णय र शैक्षिक सुधारका पहलहरूलाई गति दिने अपेक्षा गरिएको छ।
