काठमाडौं । सुनसरीको नेपाल–भारत सीमाक्षेत्रमा भएको गोलीकाण्डमा कोशी गाउँपालिका–१ का ४५ वर्षीय विजय साहको मृत्यु भएको छ । घटना सशस्त्र प्रहरी बलको बेस क्याम्प बीओपी लौकही नजिकै पर्ने पुरी टोलमा भएको हो ।
जिल्ला प्रहरी कार्यालय सुनसरीका प्रवक्ता चन्द्रबहादुर खड्काका अनुसार सिटी सफारीमार्फत सामान ल्याउने क्रममा चालकलाई लक्षित गरी गोली चलाइएको प्रारम्भिक अनुसन्धानबाट देखिएको छ । घटनास्थलमा गोलीको खोका फेला परेको र घटनाबारे विस्तृत अनुसन्धान जारी रहेको प्रहरीले जनाएको छ ।
घटनापछि स्थानीयवासी तथा मृतकका परिवारजनले विरोध प्रदर्शन सुरु गरेका छन् । प्रारम्भिक रिपोर्टअनुसार गोली सशस्त्र प्रहरीतर्फबाट चलेको हुनसक्ने आशंका गरिएको छ, यद्यपि यसबारे आधिकारिक पुष्टि भइसकेको छैन ।
प्रहरीले घटनास्थल नियन्त्रणमा राखी अनुसन्धानलाई तीव्र बनाएको जनाएको छ ।
