काठमाडौँ । नेकपा (एमाले)का सांसद सुहाङ नेम्वाङले संसदको गरिमा कायम राख्दै आरोप–प्रत्यारोपभन्दा रचनात्मक र परिणाममुखी बहसमा ध्यान केन्द्रित गर्नुपर्नेमा जोड दिएका छन्।
बुधवार प्रतिनिधि सभाको बैठकमा बोल्दै उनले संसदको धेरै समय असंसदीय व्यवहारमा खर्च हुँदा जनअपेक्षा अनुसार काम हुन नसकेको बताएका हुन्। “स्वच्छ बहस जीवित लोकतन्त्रको मेरुदण्ड हो,” उनले भने, “तर कहिलेकाहीँ हामी गालीगलौज, आरोप–प्रत्यारोपमा अल्झिन्छौं, जसले हाम्रो मूल जिम्मेवारी ओझेलमा पर्छ।”
उनले संसदको समय शिक्षा, स्वास्थ्य, पर्यटन, खेलकुद र विकासजस्ता जनजीविकासँग जोडिएका विषयमा केन्द्रित हुनुपर्नेमा जोड दिए। साथै, नीति नियम प्रभावकारी बनाउँदै आमजनतालाई सकारात्मक परिवर्तनको अनुभूति दिनुपर्ने सुझावसमेत उनले दिए।
नेम्वाङले संसदबाटै सुधारको सुरुआत गर्नुपर्ने भन्दै तथ्यहीन बोल्ने सांसदमाथि कारबाहीको व्यवस्था गर्नुपर्ने माग गरे। साथै, संसदमा उठेका प्रश्नको जवाफ समयमा दिन मन्त्रीहरूको ध्यानसमेत आकर्षण गराए।
