काठमाडौं । चितवनको भरतपुर महानगरपालिका–२९ स्थित सिमलताल नजिक त्रिशूली नदी किनारमा लामो समयदेखि बेपत्ता रहेको बसको टुक्रा भेटिएको छ ।
फेला परेको बसको टुक्रा सिमलताल नजिकै तनहुँतर्फको बगर क्षेत्रमा देखिएको थियो । प्रारम्भिक अनुसन्धानका अनुसार फेला परेको बसको टुक्रा २०८१ साल असार २८ गते त्रिशूली नदीमा खसेर बेपत्ता भएका दुईवटा डिलक्स बसमध्ये एकको रहेको प्रहरीले जनाएको छ ।
प्रहरीका अनुसार बसका अवशेष बालुवामा पुरिएका अवस्थामा फेला परेको छ । दुर्घटना स्थलबाट करिब ३०० मिटर तल फेला परेको हो।
गत वर्ष सिमलताल क्षेत्रमा आएको लेदोसहितको पहिरोका कारण बागमती प्रदेश–०३–००१ ख २४९५ नम्बरको गणपति डिलक्स र बागमती प्रदेश–०३–००६ ख १५१६ नम्बरको एन्जल डिलक्स बस त्रिशूली नदीमा खसेका थिए। सो दुर्घटनामा बसमा सवार २५ जनाको शव फेला परेको थियो भने करिब ४० जना अझै बेपत्ता छन्।
