काठमाडौं । साता कारोबारको तेस्रो दिन मंगलबार शेयर बजार परिसूचक नेप्से ९.९३ अंकले वृद्धि भई २६४९ अंकमा पुगेको छ।
कारोबार सुरु भएदेखि नै बजार सामान्य रूपमा बढेको देखिए पनि दिनभर उतारचढाव रह्यो। नेप्से ११:५७ बजे २६६२ अंकसम्म पुगेको थियो तर त्यसपछि सो बिन्दु पार गर्न सकेन।
मंगलबार कारोबार रकममा उल्लेख्य वृद्धि देखिएको छ। अघिल्लो दिन ६ अर्ब ४७ करोड रुपैयाँको कारोबार भएकोमा आज ७ अर्ब १२ करोड रुपैयाँको कारोबार भएको छ, जुन पछिल्लो एक महिनायताकै उच्च हो। आज १४८ कम्पनीको शेयरमूल्य बढ्दा १०३ कम्पनीको घट्यो भने ८ कम्पनीको मूल्य स्थिर रह्यो।
यस दिन फाइनान्स समूहमा लगानीकर्ताको आकर्षण देखिएको छ। सो समूह सबैभन्दा धेरै २.८७ प्रतिशतले बढ्यो। अघिल्लो दिन सबैभन्दा धेरै बढेको उत्पादन तथा प्रशोधन समूह भने आज ०.५१ प्रतिशतले घट्यो। त्यस्तै होटल तथा पर्यटन समूह ०.२३ प्रतिशतले घट्यो।
अन्य समूहहरूको अवस्था यस्तो रह्योः
बैंकिङ ०.४३ प्रतिशत,
विकास बैंक ०.७९ प्रतिशत,
हाइड्रोपावर ०.१३ प्रतिशत,
लगानी ०.३२ प्रतिशत,
जीवन बीमा ०.०४ प्रतिशत,
माइक्रोफाइनान्स ०.८४ प्रतिशत,
निर्जीवन बीमा ०.१२ प्रतिशत,
अन्य ०.७७ प्रतिशत र
व्यापार समूह ०.५४ प्रतिशतले बढे।
व्यक्तिगत कम्पनीतर्फ हेर्दा जीवन विकास लघुवित्तको शेयरमूल्य १० प्रतिशतले बढ्यो। त्यस्तै थ्रीस्टार हाइड्रोपावर ९.५४ प्रतिशत, जानकी फाइनान्स ५.८३ प्रतिशत, गुडविल फाइनान्स ५.४६ प्रतिशत र एसवाई प्यानल ५.४३ प्रतिशतले बढे।
घट्ने कम्पनीतर्फ रुरु जलविद्युतको शेयरमूल्य सबैभन्दा धेरै ८.४१ प्रतिशतले घट्यो। त्यस्तै ट्रेड टावर ६.२६ प्रतिशत, सान्भी इनर्जी ५.६१ प्रतिशत, बन्दीपुर केबुलकार ५.४२ प्रतिशत र श्रीनगर एग्रिटेक कम्पनी ५.१६ प्रतिशतले घटे।
आज सबैभन्दा धेरै कारोबार भएका पाँच कम्पनीमा एसवाई प्यानल, बुटवल पावर, शिवम् सिमेन्ट, बन्दीपुर केबुलकार र मञ्जुश्री फाइनान्स रहेका छन्।
