काठमाडौं । नेपाल स्टक एक्सचेञ्ज (नेप्से) परिसूचक सामान्य अंकले बढेर बन्द भएको छ। पछिल्ला तीन कारोबार दिनदेखि निरन्तर घट्दै आएको नेप्से यस दिन भने सामान्य सुधारसहित बन्द भएको हो। मंगलबार नेप्से परिसूचक ३.२७ अंकले बढेर २,५८४.४९ विन्दुमा पुगेको छ। यससँगै सेन्सेटिभ इण्डेक्स १.५७ अंकले बढेको छ भने फ्लोट इण्डेक्स ०.१२ अंक र सेन्सेटिभ फ्लोट इण्डेक्स ०.३१ अंकले वृद्धि भएको छ।
नेप्से बढे पनि कारोबार रकम भने अघिल्लो दिनको तुलनामा केही घटेको छ। सोमबार ३ अर्ब ५१ करोड रुपैयाँ बराबरको शेयर कारोबार भएको बजारमा यस दिन ३२८ कम्पनीको ९२ हजार ७४६ पटकको कारोबारमार्फत ३ अर्ब ४२ करोड ९८ लाख ९३ हजार रुपैयाँ बराबरको ७६ लाख ६८ हजार कित्ता शेयर किनबेच भएको छ।
कारोबारका क्रममा यस दिन एसवाई प्यानल नेपालको शेयरमूल्य सर्वाधिक ७.०१ प्रतिशतले बढेको छ। त्यसैगरी गुराँस लघुवित्त वित्तीय संस्था, सयपत्री हाइड्रोपावर र ग्रामीण विकास लघुवित्त वित्तीय संस्थाको शेयरमूल्य करिब ६ प्रतिशतले बढेको छ। यता, सिटिजन लाइफ इन्स्योरेन्सको शेयरमूल्य भने सर्वाधिक ५.९७ प्रतिशतले घटेको छ।
कारोबार रकमका आधारमा पनि एसवाई प्यानल नेपाल शीर्ष स्थानमा रह्यो। सो कम्पनीको यस दिन ३० करोड ९८ लाख रुपैयाँ बराबरको शेयर कारोबार भएको छ। त्यसपछि सागर डिष्टिलरीको साढे ८ करोडभन्दा बढीको कारोबार भएको छ भने सिईडिबी होल्डिङ्ग्सको कारोबार रकम ७ करोड रुपैयाँ नाघेको छ।
१३ उपसमूहमध्ये यस दिन ७ उपसमूहको परिसूचक बढेको छ भने ६ उपसमूहको परिसूचक घटेको छ। अन्य उपसमूहको परिसूचक सर्वाधिक १.२८ प्रतिशतले बढेको छ। बाँकी बढेका उपसमूहहरूको वृद्धि सामान्य रहेको छ। विकास बैंक, लगानी, जीवन बीमा, म्युचुअल फण्ड, निर्जीवन बीमा र व्यापार उपसमूहको परिसूचक भने यस दिन घटेको छ।
