काठमाडौं । लगातार ८ कारोबार दिन बढेको सेयर बजार आइतबार ओरालो लागेको छ। नेपाल स्टक एक्सचेन्ज (नेप्से) परिसूचक १८.४४ अंकले घटेर २,९६४ विन्दुमा पुगेको छ।
बजार बिहान सुरुमा नै ३,०१२ अंकसम्म पुगे पनि त्यसपछि बिक्री चाप बढ्दा बजारले गिरावट व्यहोरेको हो। गत वर्ष साउन ३० गते नेप्से परिसूचक ३ हजार अंकमै पुगेको थियो र यसले त्यो स्तरलाई प्रतिरोधको रूपमा सामना गरिरहेको छ। चार वर्षअघि २०७८ भदौ २ गते नेप्से परिसूचक ३१९८ अंकमा पुगेको थियो।
आजको कारोबार रकम उल्लेख्य रूपमा बढेर २६ अर्ब ५७ करोड रुपैयाँ पुगेको छ, जुन गत बिहीबारको १८ अर्ब ४९ करोडभन्दा धेरै हो। यो कारोबार रकम गत वर्ष भदौ २ को यतिका उच्च स्तरकै नजिक छ।
बजार समूहमा उतारचढाव
आजको कारोबारमा हाइड्रोपावर समूह सबैभन्दा अग्रस्थानमा रहेको छ। यस समूहमा मात्रै ११ अर्ब ६२ करोड रुपैयाँ बराबरको कारोबार भएको छ, जसले कुल कारोबारको ४३ प्रतिशत हिस्सा ओगटेको छ।
विकास बैंक, माइक्रोफाइनान्स, र उत्पादन समूहमा पनि दुई अर्बभन्दा बढीको कारोबार भएको छ।
आज ६३ कम्पनीको शेयर मूल्य बढ्दा १८६ कम्पनीको मूल्य घटेको छ। विकास बैंक १.२३%, उत्पादन तथा प्रशोधन १.०८%, र व्यापार समूह १.४४% ले बढेका छन्। माइक्रोफाइनान्स भने एक अंकभन्दा कमले हरियो देखिएको छ।
फाइनान्स समूह सबैभन्दा धेरै १.९९% ले घटेको छ। बैंकिङ ०.७१%, होटल तथा पर्यटन १.७९%, हाइड्रोपावर १.०९%, लगानी १.६६%, जीवन बीमा १.३५%, निर्जीवन बीमा ०.६७%, र अन्य समूह ०.८६% ले घटेका छन्।
उत्कृष्ट प्रदर्शन गर्ने कम्पनीहरू
आज तीन कम्पनीको मूल्य १० प्रतिशतले वृद्धि भएको छ। ती कम्पनीहरूमा समता घरेलु लघुवित्त, ट्रेड टावर, र सान्भी इनर्जी रहेका छन्। हालै सूचीकृत ट्रेड टावरको शेयर मूल्य प्रतिकित्ता ७१३ रुपैयाँ पुगेको छ भने सान्भी इनर्जीको मूल्य ६३५.६० रुपैयाँ पुगेको छ।
त्यस्तै लुम्बिनी विकास बैंक ८.४७%, ग्रिन भेन्चर्स ६.२९%, र सगरमाथा जलविद्युत कम्पनी ६% ले मूल्य वृद्धि भएको छ।
सबैभन्दा धेरै मूल्य घटेका कम्पनीहरू
नारायणी डेभलपमेन्ट बैंकको शेयर मूल्य ६.३४%, राप्ती हाइड्रो ४.९९%, र बुटवल पावर ४.११% ले घटेको छ।
आज सबैभन्दा धेरै कारोबार भएका पाँच कम्पनीहरूमा शिवम् सिमेन्ट, ङादी ग्रुप, नेपाल पुनर्बीमा, कालिका पावर, र ग्रिन भेन्चर्स रहेका छन्।
