काठमाडौं । नेपाल कम्युनिष्ट पार्टी (एमाले)का महासचिव शंकर पोखरेलले जन्मजात श्रेष्ठताका आधारमा शासन व्यवस्था प्रणाली नेपाली जनतालाई स्वीकार्य नहुने धारणा राखेका छन् ।
राष्ट्रिय युवा संघ नेपालको १० औँ राष्ट्रिय महाधिवेशनको आज पोखरामा आयोजित समारोहमा उनले पूर्वराजसहित समर्थकहरूले जनताको सम्प्रभुता खोस्ने षड्यन्त्र गरिरहेका बताउँदै गणतन्त्र विरोधी गतिविधि नेपाली जनतालाई स्वीकार्य नहुने बताए ।
राजाको शासन व्यवस्थामा जन्मजात श्रेष्ठतालाई मान्यता दिइए पनि वर्तमान सन्दर्भमा यो प्रणाली स्वीकार्न नसकिने बताउँदै महासचिव पोखरेलले पछिल्ला समयमा संघीय लोकतान्त्रिक गणतन्त्र विरोधी गतिविधिहरू बढिरहेकाले यस विरुद्ध गणतन्त्र पक्षधर सबै एकजुट हुनुपर्नेमा जोड दिए ।
नेपाली काँग्रेस र एमाले नेतृत्वको वर्तमान सरकारले रेलमार्ग, सुरुङमार्गलगायत पूर्वाधार निर्माण र विकासका क्षेत्रमा उपलब्धिमूलक काम गर्दै आएको उनले उल्लेख गरे । “यसअघि पनि एमाले नेतृत्वको सरकारका समयमा मुलुकमा विकास, निर्माणका क्षेत्रमा उल्लेख्य काम भएका थिए”, उनले भने, “सामाजिक सुरक्षा भत्ताको सुरुआतसहित अन्य सामाजिक क्षेत्रमा सकारात्मक र उपलब्धिमूलक काम पार्टी नेतृत्वबाट भएका छन् ।” मुलुक बनाउन युवाहरू जागरूक बन्नुपर्नेमा उनले जोड दिए ।
एमालेका स्थायी कमिटी सदस्य एवं गण्डकी प्रदेशका पूर्व मुख्यमन्त्री खगराज अधिकारीले मुलुकमा आर्थिक समृद्धि हासिल गर्न स्थानीय उत्पादनलाई जोड दिनुपर्ने आवश्यकता औँल्याए । राष्ट्रको विकास र समृद्धिका लागि युवा जागरूक हुनुपर्ने उनको भनाइ छ ।
संघका अध्यक्ष क्षितिज थेवेको अध्यक्षतामा भएको कार्यक्रममा पार्टीका स्थायी कमिटी सदस्य एवं जनवर्गीय संगठन प्रमुख भानुभक्त ढकाल, राष्ट्रिय युवा संघका इञ्चार्ज राजीव पहारी, संघका पूर्वअध्यक्ष महेश बस्नेतलगायत वक्ताले महाधिवेशनको सफलताको कामना गरेका थिए ।
