काठमाडौँ । बंगलादेशको अन्तर्राष्ट्रिय अपराध न्यायाधीकरण (आईसीटी) ले देशकी पूर्वप्रधानमन्त्री तथा अपदस्थ अवामी लिग नेतृ शेख हसिनालाई अदालतको अवहेलनाको मुद्दामा ६ महिनाको जेल सजाय सुनाएको छ।
बुधबार ढाकास्थित अदालतको न्यायाधीश एमडी गोलाम मोर्तुजा मोजुम्दार नेतृत्वको तीन सदस्यीय इजलासले हसिनालाई अनुपस्थितमै दोषी ठहर गर्दै सजाय तोकेको हो।
उक्त मुद्दा हसिनाले गत वर्ष अक्टोबरमा गाइबान्धाको गोबिन्दगञ्जका नेता शाकिल अकन्द बुलबुलसँग गरेको फोन संवाद लीक भएका आधारमा दायर भएको थियो। अडियोमा हसिनाले “ममाथि २२७ मुद्दा छन्, त्यसैले मलाई २२७ जनालाई मार्ने इजाजत छ” भन्ने विवादास्पद अभिव्यक्ति दिएकी थिइन्, जुन सामाजिक सञ्जालमार्फत सार्वजनिक भएको थियो।
यसै मुद्दामा शाकिल अकन्द बुलबुललाई पनि २ महिनाको जेल सजाय सुनाइएको छ। उनी अवामी लिगको विद्यार्थी संगठन छत्र लिगका नेता हुन्।
यसअघि सन् २०२५ को जुन महिनामा आईसीटीले हसिनामाथि मानवता विरुद्धका अपराध अन्तर्गत औपचारिक अभियोग लगाएको थियो। अभियोजन पक्षका अनुसार, २०२४ को जुलाईमा देशभर भएको जनविद्रोहका क्रममा भएका सामूहिक हत्याका योजनाकार मध्ये प्रमुख हसिना नै हुन्।
मुख्य अभियोजक मोहम्मद ताजुल इस्लाम र उनको टोलीले अदालतमा बुझाएको अभियोगपत्रमा हसिनाले २०२४ को जुलाई र अगस्टमा भएका हिंसात्मक दमनको निर्देशन दिएको उल्लेख छ।
सन्दर्भस्वरूप, अगस्ट ५, २०२४ मा हसिनाले प्रधानमन्त्री पदबाट राजीनामा दिँदै ढाकास्थित आफ्नो सरकारी निवास खाली गरेकी थिइन् र त्यसपछि भारत प्रस्थान गरेकी थिइन्। त्यतिबेला ढाकामा कर्फ्युको अवज्ञा गर्दै हजारौँ प्रदर्शनकारीहरू सडकमा उत्रिएका थिए।
