काठमाडौं । प्रधानमन्त्री सुशीला कार्कीले सिफारिस गरेका नयाँ मन्त्रीमध्ये दुई जनाले मात्रै शपथ लिएका छन् । राष्ट्रपति निवास शितलनिवासमा आयोजित विशेष समारोहमा राष्ट्रपति रामचन्द्र पौडेलले शपथ ग्रहण गराएका हुन् ।
शपथ लिनेमा बब्लु गुप्ता र डा. सुधा शर्मा गौतम रहेका छन् । गुप्तालाई युवा तथा खेलकुद मन्त्रालय र शर्मालाई स्वास्थ्य तथा जनसंख्या मन्त्रालयको जिम्मेवारी दिइएको छ ।
यसअघि प्रधानमन्त्री कार्कीले खगेन्द्र सुनारलाई श्रम, रोजगार तथा सामाजिक सुरक्षा मन्त्रालय र गणपतिलाल श्रेष्ठलाई संस्कृति, पर्यटन तथा नागरिक उड्डयन मन्त्रालयको जिम्मेवारी दिनेगरी राष्ट्रपतिसमक्ष सिफारिस गरेकी थिइन्।
तर, सुनारको नाममा दुईवटा मुद्दा र विवाद सार्वजनिक भएपछि प्रधानमन्त्रीले सोबारे थप छलफल गरेकी थिइन्। सोही छलफलपछि सुनारसहित श्रेष्ठको पनि शपथ स्थगित गरिएको स्रोतले जनाएको छ ।
