काठमाडौं । सानिगाड हाइड्रो लिमिटेडले आज आइतबार प्राथमिक शेयर (आइपिओंं) बिक्री खुला गरेको छ। कम्पनीले पहिलो चरणमा आयोजना प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीका लागि शेयर निष्काशन गरेको हो।
कम्पनीले जारी पूँजी २ अर्ब ८५ करोड रुपैयाँको ३० प्रतिशत बराबर ८५ लाख ५० हजार कित्ता साधारण शेयर निष्काशन गर्न अनुमति पाएकोमध्ये पहिलो चरणमा २८ लाख ५० हजार कित्ता शेयर आयोजना प्रभावित क्षेत्रका बासिन्दाका लागि छुट्याएको छ।
यसअन्तर्गत बझाङको बुंगल नगरपालिका वडा नम्बर १, २ र ४ का अति प्रभावित क्षेत्रका बासिन्दालाई १८ लाख ५२ हजार ५०० कित्ता शेयर बाँडफाँट गरिनेछ भने वडा नम्बर ३, ५, ६, ७, ९, १० र ११ का बासिन्दालाई बाँकी ९ लाख ९७ हजार ५०० कित्ता शेयर उपलब्ध गराइने कम्पनीले जनाएको छ।
यससँगै सर्वसाधारणका लागि छुट्याइएको हिस्सामध्ये १० प्रतिशत अर्थात् ५ लाख ७० हजार कित्ता शेयर वैदेशिक रोजगारीमा रहेका नेपालीका लागि छुट्याइएको छ। श्रम स्वीकृति लिएर विदेशमा कार्यरत नेपालीले प्रतिकित्ता १०० रुपैयाँका दरले आवेदन दिन सक्नेछन्।
आईपीओमा न्यूनतम १० कित्ता र अधिकतम २० हजार कित्तासम्म आवेदन दिन पाइनेछ। आयोजना प्रभावित क्षेत्रका स्थानीयका लागि आवेदन छिटोमा चैत २२ गते बन्द हुनेछ भने मागअनुसार पूरा नभए बैशाख ७ गतेसम्म खुला रहनेछ। वैदेशिक रोजगारीमा रहेका नेपालीका लागि भने छिटोमा चैत ११ गते र ढिलोमा चैत २२ गतेसम्म आवेदन दिन सकिनेछ।
कम्पनीको शेयर निष्काशनअघि गरिएको मूल्याङ्कनमा इक्रा नेपाल ले ‘इक्रएनपी इस्यूअर रेटिङ डबल बी माइनस’ प्रदान गरेको छ, जसले कम्पनीको वित्तीय दायित्व बहन क्षमतामा मध्यम जोखिम रहेको संकेत गर्छ।
सानिगाड हाइड्रोले निर्माण गरिरहेको ३८.४६ मेगावाटको माथिल्लो कालंगागाड जलविद्युत् आयोजना कुल ८ अर्ब ६८ करोड ७० लाख रुपैयाँ लागतको हो। प्रतिमेगावाट लागत २२ करोड ५८ लाख रुपैयाँ रहेको यो आयोजनाबाट लगानी फिर्ता हुने सामान्य अवधि ८।२५ वर्ष र छुटदरमा १४.६९ वर्ष अनुमान गरिएको छ।
आईपीओको बिक्री प्रबन्धक लक्ष्मी सनराइज क्यापिटल लिमिटेड रहेको छ। स्थानीय बासिन्दाले लक्ष्मी सनराइज बैंक चैनपुर शाखासहित ग्लोबल आइएमई बैंक, राष्ट्रिय वाणिज्य बैंक र कृषि विकास बैंक का बझाङ शाखाबाट आवेदन दिन सक्नेछन्।
विदेशमा रहेका नेपालीले भने आस्बा सेवामा सहभागी बैंक तथा वित्तीय संस्थामार्फत ‘सी–आस्बा’ प्रणाली प्रयोग गरेर आवेदन दिन सक्नेछन्।
