काठमाडौं । प्रतिनिधिसभा विघटनका विषयमा प्रमुख दल नेपाली कांग्रेस र नेकपा (एमाले) बीच फरक–फरक धारणा देखिएको छ। सभामुख देवराज घिमिरेले बुधबार सिंहदरबारस्थित संघीय संसद् सचिवालयमा विघटित प्रतिनिधिसभामा प्रतिनिधित्व गर्ने ६ दलसँग गरेको छलफलमा दुई ठूला दलबीच मतभेद स्पष्ट देखिएको हो।
छलफलमा सहभागी नेपाली कांग्रेसका प्रमुख सचेतक श्यामकुमार घिमिरेले संसद् विघटन असंवैधानिक भएको पार्टीको धारणा रहे पनि सर्वोच्च अदालतमा रिट दायर भइसकेकाले त्यसको आदेश र व्याख्यालाई स्वीकार गर्दै सरकारद्वारा घोषणा गरिएको निर्वाचनको तयारी सुरु गर्नुपर्ने बताएका थिए।
उनले भने, “आठ दलका प्रमुख सचेतकले संसद् विघटन असंवैधानिक भनिसकेका छन्। पार्टीको कार्यसम्पादन समिति बैठकले पनि सो धारणा दोहोर्याएको छ। तर कांग्रेस लोकतान्त्रिक पार्टी हो, त्यसैले निर्वाचनबाट भाग्दैन। सर्वोच्चको फैसला जसरी आउँछ, त्यसको सम्मान गर्छ।”
यता नेकपा (एमाले) का प्रमुख सचेतक महेश बर्तौलाले भने प्रतिनिधिसभा पुनर्स्थापना नै संविधानिक बाटोमा फर्किने उपाय भएको बताएका छन्। उनका अनुसार, सुशीला कार्की नेतृत्वको वर्तमान सरकारले निर्वाचन गराउने तयारी नगरेको र देश संवैधानिक मार्गभन्दा बाहिर गइरहेको कारण संसद् पुनर्स्थापना आवश्यक छ।
बर्तौलाले भने, “अहिले निर्वाचन गराउने स्थिति छैन। गृह प्रशासन दलका नेताहरूलाई नै गिज्याउँदै हिँड्न थालेको छ। सरकारलाई लुटिएका हतियार फिर्ता ल्याउने चासो छैन। यस्तो अवस्थामा देशलाई बाटोमा ल्याउने एकमात्र उपाय प्रतिनिधिसभा पुनर्स्थापना हो।”
त्यस्तै, नेकपा (एकीकृत समाजवादी) का उपाध्यक्ष राजेन्द्र पाण्डेले पार्टीले निर्वाचनको तयारी अघि बढाइसकेको र त्यसअनुसार काम भइरहेको बताएका छन्।
सभामुख देवराज घिमिरेले प्रतिनिधिसभा पुनर्स्थापनाबारे दलहरूका धारणा संकलन गर्न बैठक बोलाएका थिए। छलफलमा सहभागी दलहरूले आ–आफ्नो राजनीतिक दृष्टिकोणका आधारमा आगामी कदमबारे सुझाव दिएका छन्।
