हेटौंडा। राष्ट्रिय प्रजातन्त्र पार्टी (राप्रपा) का बागमती प्रदेशसभा सदस्य चार जनालाई पदमुक्त गर्ने पार्टीको निर्णय कार्यान्वयन नहुने भएको छ।
राप्रपा केन्द्रीय कार्यसम्पादन समितिको निर्णयका आधारमा सांसदहरूलाई पदमुक्त गर्न नमिल्ने निष्कर्षमा बागमती प्रदेशसभा उपसभामुख पुगेकी हुन्। उपसभामुखले बुधबार चारै सांसदलाई पदमुक्त नगर्ने निर्णय गरेकी प्रदेशसभा प्रवक्ता तथा उपसचिव प्रकाश चापागाईंले जानकारी दिए।
राप्रपा संसदीय दलका नेता उद्धव थापासहित राजु विष्ट, गिरबहादुर तामाङ र राजेन्द्र प्रजापतिलाई प्रदेशसभा सदस्यबाट पदमुक्त गर्न माग गर्दै राप्रपा अध्यक्ष राजेन्द्र लिङ्देनले प्रदेशसभा सचिवालयमा पत्र पठाएका थिए।
पत्रमाथि अध्ययनपछि उपसभामुखले चारै सांसदको पद रिक्त भएको मान्न सकिने कानुनी आधार नपुगेको ठहर गरेकी हुन्। सांसदहरूले संसदीय दलको ह्विप उल्लंघन गरेको पुष्टि हुने आधार नदेखिएको तथा कारबाहीको प्रक्रिया पनि निर्धारित विधिअनुसार अघि नबढेको निर्णयमा उल्लेख छ।
त्यस्तै, सम्बन्धित सांसदहरूलाई आफ्नो पक्षमा सफाइ पेस गर्ने पर्याप्त अवसरसमेत नदिइएको उपसभामुखको निष्कर्ष छ। राप्रपाको विधानअनुसार पार्टी अनुशासनसम्बन्धी कारबाही गर्दा पूरा गर्नुपर्ने प्रक्रिया पालना नभएकाले केन्द्रबाट गरिएको पदमुक्तसम्बन्धी निर्णय त्रुटिपूर्ण देखिएको प्रदेशसभा सचिवालयले जनाएको छ।
यससँगै उद्धव थापा, राजु विष्ट, गिरबहादुर तामाङ र राजेन्द्र प्रजापति बागमती प्रदेशसभामा सांसदकै रूपमा यथावत रहने भएका छन्।
मुख्यमन्त्री किरण थापा नेतृत्वको सरकारमा सहभागी भएको विषयलाई लिएर अध्यक्ष लिङ्देनले चार सांसदविरुद्ध कारबाही अघि बढाएका थिए। तर, प्रदेशसभा उपसभामुखको निर्णयसँगै चार सांसदलाई पदमुक्त गर्ने राप्रपाको प्रयास तत्कालका लागि रोकिएको छ।
बागमती प्रदेशसभामा चार सांसदलाई कारबाही गर्न राप्रपा केन्द्रीय समितिले भदौ ८ गते पत्र दर्ता गराएको थियो।
