काठमाडौं । रसुवामा मङ्गलबार आएको भीषण बाढीमा ज्यान गुमाएका नौजनामध्ये आठजनाको शव काठमाडौं ल्याइएको छ। नेपाल प्रहरीका अनुसार ती शवहरू महाराजगञ्जस्थित शिक्षण अस्पतालमा राखिएको छ।
नेपाल प्रहरीका केन्द्रीय प्रवक्ता, प्रहरी नायब महानिरीक्षक (डीआईजी) विनोद घिमिरेले आठ शवमध्ये हालसम्म एकजनाको मात्र सनाखत भएको जानकारी दिए। सनाखत भएका व्यक्तिको आजै अन्त्येष्टि गरिएको छ।
बाढीका कारण रसुवाबाट बेपत्ता भएका प्रहरी सहायक निरीक्षक लालबहादुर श्रेष्ठको शव चितवनको १५ किलोस्थित त्रिशूली नदी किनारमा फेला परेको थियो। श्रेष्ठको शव परिवारलाई बुझाई आजै अन्त्येष्टि गरिएको छ।
प्रहरीका अनुसार हालसम्म फेला परेका शवमध्ये पाँचवटाको मात्रै पहिचान गर्न सकिने अवस्था रहेको छ भने बाँकी चारवटा मानव अङ्गका रूपमा फेला परेका छन्, जसको डिएनए परीक्षण आवश्यक रहेको छ।
बाढीपछि अझै पनि १९ जना बेपत्ता छन्। तीमध्ये दुई जना नेपाली प्रहरी, ६ जना चिनियाँ नागरिक र ११ जना सर्वसाधारण रहेको प्रहरीले जनाएको छ।
बाढीले नेपाल–चीन सीमा क्षेत्रको मितेरी पुल बगाएको छ भने २४ वटा कन्टेनर, ६ वटा ट्रक र ३५ वटा विद्युत् गाडी (EV) समेत बगाएको छ। त्यस्तै, धुन्चे–टिमुरे सडक खण्ड अवरुद्ध भएको छ। बाढीबाट रसुवागढी जलविद्युत् आयोजनाको ड्याम तथा रसुवाको भन्सार कार्यालय यार्डमा समेत क्षति पुगेको छ।
बागमती प्रदेश प्रहरी कार्यालयका प्रवक्ता प्रहरी वरिष्ठ उपरीक्षक सञ्जय सिंह थापाका अनुसार हाल विभिन्न जिल्लाका नदी किनारमा बेपत्ताहरूको खोजी कार्य जारी छ। साथै, रसुवाका विभिन्न स्थानमा अलपत्र परेका नागरिकहरूको उद्धार कार्य पनि चलिरहेको छ।
